கண்ணீர்..! “அம்மாவை நல்லா பார்த்துக்கோங்க, தம்பி நல்லா படிங்க” எஃகு ஆலை தீ விபத்தில் படுகாயமடைந்த தொழிலாளி வெளியிட்ட உருக்கமான இறுதி வீடியோ..!

விசாகப்பட்டினம் எஃகு ஆலையில் ஏற்பட்ட விபத்தில் படுகாயமடைந்த தொழிலாளி ஒருவர் உயிரிழப்பதற்கு முன் தனது குடும்பத்தினருக்கு உருக்கமாகப் பேசிய இறுதி வீடியோ செய்தி சமூக வலைத்தளங்களில் வைரலாகி வருகிறது. உருகிய இரும்பு திரவம் கொட்டிய விபத்தில் தீவிர தீக்காயமடைந்த தொழிலாளி, தனது மூத்த மகனிடம் தம்பியைக் கவனித்துக் கொள்ளுமாறும், இருவரும் நன்றாகப் படிக்குமாறும், தாயைப் பத்திரமாகப் பார்த்துக் கொள்ளுமாறும் கண்ணீருடன் வேண்டுகோள் விடுத்துவிட்டுப் பரிதாபமாக உயிர் பிரிந்துள்ளார்.

இந்தத் துயரமான விபத்து திங்கள்கிழமை மாலை எஃகு உருக்கு ஆலை-1-ல் வார்ப்புப் பணியின் போது ஏற்பட்டுள்ளது. கிரேன் மூலம் ஒரு வாளியில் கொண்டு செல்லப்பட்ட சுமார் 1,600 டிகிரி செல்சியஸ் வெப்பநிலைக் கொண்ட உருகிய இரும்புத் திரவம் திடீரென வெடித்துச் சிதறியதால் இந்த விபத்து நிகழ்ந்தது. இந்த பயங்கர தீ விபத்தில் சிக்கி 8 தொழிலாளர்கள் உயிரிழந்துள்ளனர். மேலும் 6 பேர் படுகாயமடைந்து மருத்துவமனையில் அனுமதிக்கப்பட்டுள்ளனர்.

https://twitter.com/hd_kumaraswamy/status/2064068802720235917/video/4

இவ்விபத்தில் உயிரிழந்த தொழிலாளர்களின் குடும்பங்களுக்கு மத்திய அரசு தலா ரூ.25 லட்சம் நிதியுதவியும், குடும்பத்தில் ஒருவருக்கு நிரந்தர அரசு வேலையும் அறிவித்துள்ளது. மேலும், பிரதமர் நரேந்திர மோடி இந்த விபத்திற்குத் தனது இரங்கலைத் தெரிவித்ததுடன், பிரதமரின் தேசிய நிவாரண நிதியிலிருந்து உயிரிழந்தவர்களின் குடும்பங்களுக்குத் தலா ரூ.2 லட்சமும், காயமடைந்தவர்களுக்குத் தலா ரூ.50,000-மும் நிதியுதவி அறிவித்துள்ளார். இந்த விபத்து குறித்து உரிய பாதுகாப்பு நெறிமுறைகள் பின்பற்றப்பட்டதா என்பது குறித்து அதிகாரிகள் தீவிர விசாரணை நடத்தி வருகின்றனர்.