“அய்யயோ… இது ரயிலா..? சண்டைக்களமா..?” ஓடும் ரயிலில்… குத்துச்சண்டை போட்ட பெண்கள்… நெஞ்சை பதறவைக்கும் சம்பவம்… வைரல் வீடியோ…!!

மும்பையின் சர்ச்கேட் – விரார் இடையே இயக்கப்பட்ட மகளிர் சிறப்பு புறநகர் இரயிலில், இரு பெண் பயணிகளுக்கிடையே ஓடும் இரயிலிலேயே ஏற்பட்ட கடுமையான மோதல் பெரும் பரபரப்பை ஏற்படுத்தியுள்ளது. அந்தேரி இரயில் நிலையத்தில் நிலவிய கடும் கூட்ட நெரிசலில் இரயிலில் ஏறும்போது ஏற்பட்ட தள்ளுமுள்ளு மற்றும் வாய் தகராறு, இறுதியில் வன்முறையாக மாறியுள்ளது. இச்சம்பவம் தொடர்பான வீடியோ சமூக வலைதளங்களில் வெளியாகி மிக வேகமாகப் பரவி வருகிறது.

இரயிலின் வாசலுக்கு அருகே நடைபெற்ற இந்த மோதலில், வாக்குவாதம் முற்றியதை அடுத்து இரு பெண்களும் ஒருவரையொருவர் தலைமுடியைப் பிடித்து இழுத்து மிகக் கொடூரமாகத் தாக்கிக் கொண்டனர். இதில் ஆத்திரமடைந்த ஒரு பெண், மற்றொரு பெண்ணின் தலையில் மொபைல் ஃபோனால் பலமாகத் தாக்கியதில் அவருக்குக் காயம் ஏற்பட்டு இரத்தம் வழிந்துள்ளது. இந்த மோதலில் ஈடுபட்டவர்கள் நாய்காவ் பகுதியைச் சேர்ந்த ஜோதி பிரசாத் சிங் (21) மற்றும் விரார் பகுதியைச் சேர்ந்த கவிதா மேதட்கர் என அடையாளம் காணப்பட்டனர். இரயில் பாயந்தர் நிலையத்தை அடைந்ததும், அங்கிருந்த இரயில்வே பாதுகாப்பு படையினர் இருவரையும் மீட்டு காவல் நிலையத்திற்கு அழைத்துச் சென்றனர்.

போலீஸ் விசாரணைக்குப் பிறகு, இரு பெண்களும் ஒருவர் மீது ஒருவர் புகார் அளிக்க விரும்பவில்லை என்றும், தங்களுக்குள் சமரசமாகப் போவதாகவும் எழுதிக் கொடுத்ததைத் தொடர்ந்து அவர்கள் எச்சரிக்கப்பட்டு விடுவிக்கப்பட்டனர். இருப்பினும், ஓடும் இரயிலில் பயணிகள் இதுபோன்று ஆபத்தான முறையில் சண்டையிட்டுக் கொள்வது, மும்பையின் உயிர்நாடியாகக் கருதப்படும் லோக்கல் இரயில்களின் பாதுகாப்பற்ற சூழலையும், அங்கு நிலவும் கடுமையான கூட்ட நெரிசலையும் மீண்டும் வெளிச்சத்திற்குக் கொண்டு வந்துள்ளது. பயணிகளின் பாதுகாப்பை உறுதி செய்ய இரயில்வே நிர்வாகம் கூடுதல் நடவடிக்கைகள் எடுக்க வேண்டும் எனப் பொதுமக்கள் கோரிக்கை விடுத்துள்ளனர்.