ஹிஜாப் போடாட்டா என்ன செய்வீங்க?… ஈரானில் சட்டத்தையே தூக்கி வீசிய பெண்கள்… இணையத்தை பிளக்கும் வைரல் வீடியோ…!

ஈரானின் தெஹ்ரான் நகரில் உள்ள வேலாயத் பூங்காவில் நடைபெற்ற ‘தெஹ்ரான் 10கே’ ஓட்டப்பந்தயத்தில், பல பெண்கள் கட்டாய ஹிஜாப் அணியாமல் பங்கேற்ற காட்சிகள் இணையத்தில் வெளியாகி வைரலாகி வருகின்றன. ஈரானில் பொது இடங்களில் பெண்கள் ஹிஜாப் அணிவது சட்டப்படி கட்டாயமாக இருக்கும் சூழலில், பல பெண் ஓட்டப்பந்தய வீராங்கனைகள் தலைமுடி மூடப்படாமல் ஓடியது உலகளவில் பெரும் கவனத்தை ஈர்த்துள்ளது. இந்த போட்டியில் ஈரானின் தேசிய சாதனையாளரான பரிசா அரப் வெற்றி பெற்றார்.

ஈரானில் 2022-ஆம் ஆண்டு மஹ்சா அமினியின் மறைவுக்குப் பிறகு வெடித்த போராட்டங்களைத் தொடர்ந்து, பெண்கள் பொது இடங்களில் ஹிஜாப் அணிவதைத் தவிர்க்கும் போக்கு அதிகரித்து வருகிறது. இதற்கு முன்பு கிஷ் தீவில் நடைபெற்ற இதுபோன்ற ஒரு ஓட்டப்பந்தயத்தில் பெண்கள் ஹிஜாப் இன்றி பங்கேற்றதற்காக, போட்டி அமைப்பாளர்கள் மீது ஈரான் அரசு நடவடிக்கை எடுத்திருந்தது. அந்நாட்டின் சட்ட விதிகள் மற்றும் தீவிரக் கட்டுப்பாடுகளுக்கு மத்தியிலும், தெஹ்ரானில் நடைபெற்ற இந்த நிகழ்வு சமூகத்தில் ஏற்பட்டு வரும் மாற்றத்தை வெளிப்படுத்துவதாக அமைந்துள்ளது.

அரசு நிறுவனங்கள் மற்றும் அதிகாரப்பூர்வ இடங்களில் ஹிஜாப் சட்டங்கள் இப்போதும் கடுமையாக பின்பற்றப்பட்டாலும், தெருக்களிலும் பொது நிகழ்வுகளிலும் பெண்கள் ஹிஜாப் இன்றி நடமாடுவது அதிகரித்து வருகிறது. குறிப்பாக, அரசு ஆதரவுப் பேரணிகள் ஒருபுறம் நடைபெறும் அதே வேளையில், மற்றொருபுறம் இத்தகைய ஓட்டப்பந்தயங்களில் பெண்கள் ஹிஜாப் இல்லாமல் சுதந்திரமாகப் பங்கேற்பது, ஈரானிய பெண்களின் உரிமைகள் மற்றும் சமூக சுதந்திரத்திற்கான ஒரு முக்கியப் போராட்டமாகக் கருதப்படுகிறது.