சமூக ஊடகங்களில் விலங்குகள் தொடர்பான வீடியோக்கள் அடிக்கடி வைரலாகி மக்களின் இதயங்களை வெல்வது வழக்கம். அந்த வகையில், தற்போது எக்ஸ் (ட்விட்டர்) தளத்தில் ஒரு பெண் தனது சமயோசித புத்தியால் ஒரு சிறிய பூனையின் உயிரைக் காப்பாற்றும் நெகிழ்ச்சியான வீடியோ ஒன்று வெளியாகி வைரலாகி வருகிறது. நாய், பூனை போன்ற விலங்குகள் பல நேரங்களில் கார்களின் அடியிலோ அல்லது எஞ்சின் பகுதியிலோ ஒளிந்து கொள்வது வழக்கம் என்பதால், வாகனங்களை எடுப்பதற்கு முன் கவனிப்பது எவ்வளவு முக்கியம் என்பதை இந்த வீடியோ உணர்த்துகிறது.
இந்த வீடியோவில், ஒரு சிறிய பூனைக்குட்டி காரின் அடிப்பகுதியில், சக்கரத்திற்கு மிக அருகில் ஆபத்தான முறையில் ஒளிந்திருந்தது. கார் உரிமையாளர் இதைக் கவனிக்காமல் காரை எடுத்திருந்தால் அந்தப் பூனையின் உயிருக்கே ஆபத்து ஏற்பட்டிருக்கும். ஆனால், அங்கு வந்த ஒரு பெண் பூனையைப் பார்த்துவிட்டு, அதை பத்திரமாக வெளியே கொண்டு வர ஒரு சாதுரியமான வழியைக் கையாண்டார். அவர் பூனைக்கு உணவைக் காட்டி ஆசைவார்த்தை கூறி, அதை காரின் அடியில் இருந்து வெளியே வரவழைத்தார். பின்னர் அதற்கு உணவளித்து, தன் வீட்டிற்கும் அழைத்துச் சென்றார்.
இந்த அழகிய வீடியோ எக்ஸ் தளத்தில் ‘@Catsworldtweet’ என்ற பக்கத்தில் பகிரப்பட்டுள்ளது. வெறும் 30 வினாடிகள் மட்டுமே கொண்ட இந்த வீடியோவை இதுவரை 20 லட்சத்திற்கும் (2 மில்லியன்) அதிகமானோர் பார்த்துள்ளனர். பல பயனர்கள் அந்தப் பெண்ணின் மனிதநேயத்தையும், புத்திசாலித்தனத்தையும் பாராட்டி கருத்துக்களைப் பகிர்ந்து வருகின்றனர். “உணவு பல நேரங்களில் உயிரைக் காப்பாற்றும்” என்றும், “இதுவரை நான் பார்த்ததிலேயே மிகவும் அழகான மீட்பு நடவடிக்கை இதுதான்” என்றும் நெட்டிசன்கள் தங்களின் நெகிழ்ச்சியை வெளிப்படுத்தி வருகின்றனர்.