டிசம்பர் 31, 2022 அன்று, பழைய ஃபரிதாபாத் சந்தையில் ஷாப்பிங் முடித்துவிட்டுத் திரும்பிக்கொண்டிருந்த இளம் பெண்ணை, சிங்ராஜ் என்ற நபர் வலுக்கட்டாயமாக அழைத்துச் சென்று பாலியல் வன்கொடுமை செய்துள்ளார். அந்தப் பெண் எதிர்த்தபோது, அவரது தாவணியாலேயே கழுத்தை நெரித்துக் கொலை செய்து, உடலை ஆக்ரா கால்வாயில் வீசியுள்ளார். ஆறு நாட்களுக்குப் பிறகு சிதைந்த நிலையில் பெண்ணின் உடல் மீட்கப்பட்டது.
இந்த வழக்கில் சம்பவ இடத்தில் நேரடிச் சாட்சிகள் இல்லாதபோதும், காவல்துறையினர் மீட்டெடுத்த சிங்ராஜின் மொபைல் போன் பதிவுகள் மற்றும் பெண்ணின் உடைகள் முக்கிய ஆதாரங்களாக அமைந்தன. குறிப்பாக, பெண்ணின் பாட்டியின் மொபைலில் பதிவான சிங்ராஜின் குரல், தடயவியல் சோதனையில் உறுதி செய்யப்பட்டது. இதன் அடிப்படையில், நீதிமன்றம் சிங்ராஜுக்கு ஆயுள் தண்டனையும், ₹2,10,000 அபராதமும் விதித்துத் தீர்ப்பளித்தது.
தண்டனை பெற்றுள்ள சிங்ராஜ் ஒரு ‘சைக்கோ கொலையாளி’ என அறியப்படுகிறார். இவர் ஏற்கனவே மூன்று மைனர் பெண்கள் உட்பட மொத்தம் ஐந்து பேரைக் கொலை செய்ததாகக் குற்றம் சாட்டப்பட்டுள்ளார். அந்த வழக்குகள் தற்போது நீதிமன்ற விசாரணையில் நிலுவையில் உள்ளன. இவருக்கு விதிக்கப்பட்டுள்ள இந்த ஆயுள் தண்டனை பாதிக்கப்பட்ட குடும்பத்தினருக்குக் கிடைத்துள்ள முக்கிய நீதியாகக் கருதப்படுகிறது.