“அரெஸ்ட் பண்ணுங்க!”… ரீல்ஸ் மோகத்தின் உச்சம்… ரயில்வே போலீசுக்கு பறந்த புகார்… சர்ச்சையை கிளப்பிய இளம்பெண்ணின் வீடியோ…!!

சமூக வலைத்தளங்களில் பிரபலமாக வேண்டும் என்பதற்காக மக்கள் எந்த எல்லைக்கும் செல்லத் தயங்குவதில்லை என்பதை நிரூபிக்கும் வகையில் தற்போது ஒரு அதிர்ச்சியூட்டும் வீடியோ இணையத்தில் வைரலாகி வருகிறது. இந்த வீடியோவில், பெண் ஒருவர் தனது சேலையின் ஒரு பகுதியை ரயில் இன்ஜினுடன் கட்டிவிட்டு, ரயில் தண்டவாளத்தின் நடுவே நின்று நடனமாடும் காட்சி இடம்பெற்றுள்ளது. எவ்வித பாதுகாப்பு உணர்வும் இன்றி, மிகவும் ஆபத்தான முறையில் ரயில் நிலையத்தில் அவர் செய்த இந்தச் செயல் அனைவரையும் முகம் சுளிக்க வைத்துள்ளது.

இந்த வீடியோ இணையத்தில் பகிரப்பட்ட சில மணி நேரங்களிலேயே பல்லாயிரக்கணக்கான பார்வைகளைப் பெற்று பெரும் விவாதத்தை கிளப்பியுள்ளது. இன்ஸ்டாகிராம் ரீல்ஸ் மற்றும் லைக்குகளுக்காக உயிரைப் பணயம் வைத்து செய்யப்படும் இது போன்ற செயல்களை பலரும் கடுமையாக விமர்சித்து வருகின்றனர். ரயில் நிலையங்கள் மற்றும் தண்டவாளங்கள் பொதுமக்களின் பயன்பாட்டிற்கும் பாதுகாப்பிற்கும் உரியவை; அங்கு இதுபோன்ற பொறுப்பற்ற சாகசங்களில் ஈடுபடுவது அந்தப் பெண்ணுக்கு மட்டுமின்றி, மற்ற பயணிகளுக்கும் பெரும் அச்சுறுத்தலாக அமையும் என நெட்டிசன்கள் தங்களின் கண்டனங்களை பதிவு செய்து வருகின்றனர்.

இந்த ஆபத்தான செயலைக் கண்ட இணையவாசிகள் பலரும் சம்பந்தப்பட்ட பெண் மீது கடும் கோபத்தை வெளிப்படுத்தியுள்ளனர். மேலும், “தயவுசெய்து இந்த வீடியோ குறித்து உடனடியாக விசாரணை நடத்த வேண்டும்” என ரயில்வே அதிகாரிகளுக்கும், காவல்துறையினருக்கும் சமூக வலைத்தளங்கள் வாயிலாக கோரிக்கை விடுத்துள்ளனர். இதுபோன்ற விபரீத ட்ரெண்டுகளுக்கு முற்றுப்புள்ளி வைக்க, விதிமுறைகளை மீறிய அந்தப் பெண் மீது தகுந்த நடவடிக்கை எடுக்கப்பட வேண்டும் என்பதே பலரின் எதிர்பார்ப்பாக உள்ளது.