உஷார்!.. பெண்கள் தனியாக செல்கிறீர்களா?… இந்த AI மேப்பை முதலில் பாருங்கள்… டெல்லி இளைஞரின் வைரல் கண்டுபிடிப்பு…!!

டெல்லியைச் சேர்ந்த ராஜ் கோமானி என்ற இளைஞர், தலைநகரில் பெண்களின் பாதுகாப்பை உறுதி செய்யும் நோக்கில் செயற்கை நுண்ணறிவு தொழில்நுட்பத்தின் உதவியுடன் புதிய வரைபடம் ஒன்றை உருவாக்கியுள்ளார். டெல்லியில் எந்தெந்த பகுதிகள் பெண்களுக்கு மிகவும் பாதுகாப்பற்றவை என்பதை துல்லியமாகச் சுட்டிக்காட்டும் வகையில் இந்த வரைபடம் வடிவமைக்கப்பட்டுள்ளது. குறிப்பாக, இரவு நேரங்களில் பெண்கள் பயணம் செய்யும்போது எந்தெந்த இடங்களை தவிர்க்க வேண்டும் அல்லது கூடுதல் கவனத்துடன் கடக்க வேண்டும் என்பதை இதன் மூலம் மக்கள் எளிதாக அறிந்துகொள்ள முடியும்.

இந்த வரைபடத்தை உருவாக்க தேசிய குற்ற ஆவணக் காப்பகத்தின் அதிகாரப்பூர்வ தரவுகளையும், ‘கிளாட்’ எனப்படும் செயற்கை நுண்ணறிவு தொழில்நுட்பத்தையும் அவர் ஒருங்கிணைத்துப் பயன்படுத்தியுள்ளார். வெறும் எண்களாகவும் பெரிய அறிக்கைகளாகவும் இருக்கும் சிக்கலான குற்றத் தரவுகளை, சாதாரண மக்களும் பார்த்த உடனே எளிதில் புரிந்துகொள்ளும் வகையில் காட்சிப்படுத்தியதே இதன் சிறப்பம்சமாகும். மேலும், அந்தப் பாதுகாப்பற்ற பகுதிகளில் எந்த வகையான குற்றவாளிகள் அதிகம் செயல்படுகிறார்கள் என்ற விவரங்களையும் இந்தத் தொழில்நுட்பம் மூலம் அவர் தனது வரைபடத்தில் இணைத்துள்ளார்.

இந்தச் செயற்கை நுண்ணறிவு வரைபடம் குறித்த விளக்க வீடியோவை அவர் தனது இன்ஸ்டாகிராம் பக்கத்தில் வெளியிட்ட நிலையில், அது இணையத்தில் வைரலாகப் பரவி வருகிறது. நாட்டின் தலைநகரிலேயே பெண்களுக்கு பாதுகாப்பற்ற பகுதிகளைச் சுட்டிக்காட்ட வேண்டிய நிலை இருப்பதை நினைத்து தான் மிகவும் வேதனைப்படுவதாக அவர் அந்த வீடியோவில் வருத்தம் தெரிவித்துள்ளார். இந்தத் தனிநபர் முயற்சியை வரவேற்றுள்ள பல இணையவாசிகள், இதைப் போன்ற வரைபடங்களை மேலும் விரிவுபடுத்தி, தொழில்நுட்ப உதவியாளர் எவரும் பயன்படுத்தும் வகையில் பொதுவெளியில் கொண்டுவர வேண்டும் எனத் தங்களது கருத்துகளைப் பதிவு செய்து வருகின்றனர்.