அடுத்த பரபரப்பு..! “பாஜகவினரால் சொந்தக் கட்சி பெண்களுக்கே பாதுகாப்பு இல்லை” இவ்வளவு நாள் பொறுமையாக இருந்தது ஏன்..? பாஜக பெண் கவுன்சிலர் கண்ணீர் புகார்..!!

தென்காசி நகர்மன்றக் கூட்டத்தில் பாஜக பெண் கவுன்சிலர் சுனிதா கண்ணீர் மல்க முன்வைத்துள்ள புகார்கள் அரசியல் வட்டாரத்தில் பெரும் பரபரப்பை ஏற்படுத்தியுள்ளன. தனது சொந்தக் கட்சியினராலேயே பெண்களுக்குப் பாதுகாப்பு இல்லை என்றும், கட்சிப் பெயருக்குக் களங்கம் ஏற்பட்டுவிடக் கூடாது என்ற நல்லெண்ணத்தில் இவ்வளவு காலம் பொறுமை காத்ததாகவும் அவர் உருக்கத்துடன் தெரிவித்தார். ஒரு மக்கள் பிரதிநிதிக்கே அச்சுறுத்தல் விடுக்கப்படுவதைச் சுட்டிக்காட்டிய அவர், பெண்களுக்கு எதிரான இத்தகைய போக்குகள் ஒருபோதும் ஏற்றுக்கொள்ள முடியாதவை எனக் கூறி நகர்மன்றக் கூட்டத்திலேயே கண்ணீர் விட்டு அழுதது அனைவரையும் அதிர்ச்சியில் ஆழ்த்தியது.

இந்த விவகாரத்தில் பாஜகவின் உள்ளூர் நிர்வாகிகள் சிலர் தனக்குக் கடுமையான நெருக்கடிகளையும் மன உளைச்சலையும் தருவதாக அவர் குற்றம் சாட்டியுள்ளார். கட்சி மேலிடம் தலையிட்டுத் தகுந்த நடவடிக்கை எடுக்க வேண்டும் என்றும், பெண்களுக்குப் பாதுகாப்பான சூழலை உருவாக்க வேண்டும் என்றும் அவர் வலியுறுத்தினார். நகர்மன்றக் கூட்டத்தில் ஒரு பெண் கவுன்சிலர் தனது சொந்தக் கட்சிக்கு எதிராகவே இத்தகைய பகிரங்கமான குற்றச்சாட்டுகளை முன்வைத்தது, தென்காசி மாவட்ட பாஜகவில் நிலவும் உட்கட்சிப் பூசலையும், பெண் நிர்வாகிகளின் பாதுகாப்புக் குறித்த கேள்விகளையும் மேலெழுப்பியுள்ளது.