வாழ்வாதாரத்திற்காக வெயிலிலும் மழையிலும் சாலையோரம் அமர்ந்து வியாபாரம் செய்யும் ஏழை எளிய மக்களின் உழைப்பு, பல நேரங்களில் சிலரின் இரக்கமற்ற செயல்களால் சுரண்டப்படுவது தொடர்கதையாகி வருகிறது. திருவள்ளூர் மாவட்டத்தைச் சேர்ந்த 70 வயது மூதாட்டி ஜெயலட்சுமி, கடந்த 35 ஆண்டுகளாக திருவொற்றியூர் பகுதியில் பழங்கள் விற்றுத் தன் வாழ்க்கையை நகர்த்தி வருகிறார். கணவரை இழந்த நிலையில், உடல்நலக் குறைபாடுகளையும் பொருட்படுத்தாமல் தனது மருத்துவச் செலவிற்காகவும் பசிக்காகவும் அவர் செய்யும் நேர்மையான உழைப்பை, ஒரு போலி ரூபாய் நோட்டு நிலைகுலையச் செய்துள்ளது.
மாம்பழ சீசன் என்பதால் ஆசை ஆசையாக வியாபாரம் செய்த அந்தப் பெரியவரிடம், இளம் பெண் ஒருவர் 150 ரூபாய்க்கு பழங்களை வாங்கிக்கொண்டு, சிறுவர்கள் விளையாடும் போலி 500 ரூபாய் நோட்டைக் கொடுத்து ஏமாற்றியுள்ளார். அந்தப் பெண் கொடுத்தது காகிதம் என்று தெரியாமல், தன்னிடம் இருந்த சொற்ப பணத்திலிருந்து மீதித் தொகையையும் எடுத்துக் கொடுத்துள்ளார் ஜெயலட்சுமி. இறுதியில் தான் ஏமாற்றப்பட்டதை உணர்ந்து, அந்தப் போலித் தாளைக் கையில் பிடித்துக்கொண்டு அவர் கதறி அழுத காட்சி காண்போர் நெஞ்சைப் பதற வைக்கிறது. ஒருவேளை உணவிற்காக நாள் முழுவதும் காத்திருக்கும் ஒரு முதியவரின் நம்பிக்கையைச் சிதைக்க எப்படி மனம் துணிந்தது என்ற கேள்வி எழுகிறது.
சமூக வலைதளங்களில் இந்த வீடியோ வைரலாகப் பரவி வரும் நிலையில், பலரும் அந்தப் பெண்ணின் செயலுக்குக் கடும் கண்டனங்களைத் தெரிவித்து வருகின்றனர். உழைக்கும் வர்க்கத்திடம் பேரம் பேசுவதும், அவர்களை ஏமாற்றுவதும் ஒருவித மனநோயைப் போன்றது. நவீன உலகில் தொழில்நுட்ப வளர்ச்சி அடைந்திருந்தாலும், சக மனிதனின் வலியுணரும் மனிதாபிமானம் தேய்ந்து வருகிறதோ என்ற அச்சம் ஏற்படுகிறது. ஆடம்பரச் செலவுகளுக்கு அஞ்சாதவர்கள், சாலையோர வியாபாரிகளிடம் சில ரூபாய்களுக்காகக் கணக்குப் பார்ப்பதும், இது போன்ற மோசடிகளில் ஈடுபடுவதும் சமூகச் சீரழிவின் வெளிப்பாடே ஆகும்.
இந்தச் சம்பவம் குறித்து இணையவாசிகள் பதிவிடும் கருத்துக்கள் சிந்திக்கத்தக்கவை. “கண்ணீர் விட்டு அழுபவரை வீடியோ எடுத்து அனுதாபம் தேடுவதை விட, அந்த இடத்திலேயே அவருக்குத் தேவையான நிதியுதவியைச் செய்து அந்த அழுகையைத் துடைப்பதே உண்மையான மனிதநேயம்” என்ற கருத்து பலரின் கவனத்தைப் பெற்றுள்ளது. பாதிக்கப்பட்ட அந்த மூதாட்டிக்கு உரிய உதவிகள் கிடைக்க வேண்டும் என்பதே அனைவரின் விருப்பமாக உள்ளது. அடுத்த முறை ஒரு சாலையோர வியாபாரியைச் சந்திக்கும்போது, அவர்களிடம் காட்டும் நேர்மையும் அன்பும்தான் நாம் இந்தச் சமூகத்திற்குச் செய்யும் ஆகச்சிறந்த அறமாகும்.