தமிழகத்தில் போதைப்பொருட்களை முழுமையாக ஒழிக்கும் நோக்கில், முதலமைச்சர் விஜய் பல்வேறு அதிரடி நடவடிக்கைகளை மேற்கொண்டு வருகிறார். விழிப்புணர்வு முகாம்கள், அதிகாரிகளுக்கு விருதுகள் என அரசு தீவிரமாக செயல்பட்டு வரும் நிலையிலும், போதைப்பொருள் கடத்தல் சம்பவங்கள் தொடர்வது அதிர்ச்சியை ஏற்படுத்தியுள்ளது. இதன் தொடர்ச்சியாக, சென்னை செங்குன்றம் பேருந்து நிலையத்தில் சந்தேகத்திற்கு இடமான வகையில் இரு பைகளுடன் நின்றிருந்த பெண்ணை காவல் ஆய்வாளர் கிருஷ்ணமூர்த்தி தலைமையிலான ரோந்துப் போலீசார் தடுத்து நிறுத்தி சோதனையிட்டனர். அப்போது, அவரிடமிருந்து சுமார் ரூ.2.50 லட்சம் மதிப்பிலான 1,500 போதை மாத்திரைகள் கண்டுபிடிக்கப்பட்டு உடனடியாகப் பறிமுதல் செய்யப்பட்டன.
பிடிபட்ட அந்தப் பெண்ணிடம் காவல்நிலையத்தில் வைத்து தீவிரமாக விசாரிக்கப்பட்டதில், அவர் பெரம்பூர் பகுதியைச் சேர்ந்த 33 வயதான துர்கா என்பது தெரியவந்தது. தன்னுடைய ஆண் நண்பரான ஆட்டோ ஓட்டுநர் ராஜியின் அறிவுறுத்தலின் பேரில், விமானம் மூலமாக மும்பை சென்று இந்த போதை மாத்திரைகளை சென்னைக்குக் கடத்தி வந்ததாக அவர் அதிரவைக்கும் வாக்குமூலத்தை அளித்துள்ளார். மும்பையிலிருந்து கொண்டுவரப்பட்ட அந்த மாத்திரைகளை ராஜியிடம் ஒப்படைப்பதற்காகவே பேருந்து நிலையத்தில் காத்திருந்தபோதுதான் அவர் போலீசாரிடம் சிக்கியுள்ளார். இதனைத் தொடர்ந்து, வழக்குப்பதிவு செய்த காவல்துறையினர் துர்காவை நீதிமன்றத்தில் ஆஜர்படுத்தி சிறையில் அடைத்தனர்.
இந்த கடத்தல் சம்பவத்தின் பின்னணியில் உள்ள முக்கிய நபரான ஆட்டோ ஓட்டுநர் ராஜி தற்போது தலைமறைவாகியுள்ளார். அவர் மீது ஏற்கனவே இரண்டு குற்ற வழக்குகள் நிலுவையில் உள்ள நிலையில், அவரைப் பிடிப்பதற்காக தனிப்படை அமைக்கப்பட்டு தீவிர தேடுதல் வேட்டை நடைபெற்று வருகிறது. தலைமறைவாக உள்ள ராஜியை கைது செய்து விசாரித்தால் மட்டுமே, இவர்களுக்கு மும்பையில் போதைப்பொருட்களை சப்ளை செய்யும் கும்பல் எது என்பது குறித்தும், சென்னையில் இதனை யாருக்கெல்லாம் விநியோகம் செய்ய திட்டமிட்டிருந்தார்கள் என்ற முழுமையான கடத்தல் நெட்வொர்க் குறித்தும் தெரியவரும் என போலீசார் தரப்பில் தெரிவிக்கப்பட்டுள்ளது.