பீகார் மாநிலம் சிவானில் அரங்கேறியுள்ள ஒரு கொடூரமான காதல் விவகாரம் ஒட்டுமொத்தப் பகுதியையும் உலுக்கியுள்ளது. ஆதித்யா குமார் ராவத் (25) என்ற இளைஞருக்கும், புரைனா கிராமத்தைச் சேர்ந்த ஒரு பெண்ணுக்கும் திருமணம் நிச்சயம் செய்யப்பட்டிருந்தது. ஆனால், அந்தப் பெண் சச்சின் என்ற தனது காதலனுடன் கடந்த மூன்று ஆண்டுகளாகப் பழகி வந்ததை மறைத்து இந்தத் திருமணத்திற்குச் சம்மதித்துள்ளார். குடும்பப் பஞ்சாயத்துக்குப் பிறகு, இருவீட்டாரும் கடந்த மே 27 அன்று கோவிலுக்குச் சென்று ஒன்றாகப் பூஜை செய்துவிட்டுத் திரும்பியுள்ளனர். எல்லாம் சுமுகமாக முடிந்தது என்று ஆதித்யா நம்பியிருந்த நிலையில், அன்று இரவே அவரது வாழ்க்கை தலைகீழாக மாறியுள்ளது.
அன்று இரவு அந்தப் பெண் ஆதித்யாவைத் தனது வீட்டிற்கு உணவருந்த வருமாறு தொலைபேசியில் அழைத்துள்ளார். அதை நம்பி அங்கு சென்ற ஆதித்யாவை, அந்தப் பெண்ணும் அவரது காதலன் சச்சினும் சேர்ந்து திட்டமிட்டுப் பின்தொடர்ந்துள்ளனர். வீட்டின் உள்ளே பேச்சுவார்த்தை நடந்து கொண்டிருந்தபோதே, சச்சின் திடீரென ஆதித்யாவின் மீது பெட்ரோலை ஊற்றித் தீ வைத்துள்ளார். இதில் 70 சதவீத தீக்காயங்களுடன் அலறிய ஆதித்யாவை அக்கம் பக்கத்தினர் மீட்டு மருத்துவமனையில் அனுமதித்துள்ளனர். தற்போது உயிருக்கு ஆபத்தான நிலையில் அவர் சிகிச்சை பெற்று வரும் வேளையில், தப்பியோடிய காதலர் ஜோடியைக் காவல் துறையினர் தீவிரமாகத் தேடி வருகின்றனர்.