தமிழக அரசியல் களம் 2026 சட்டமன்றத் தேர்தலை நோக்கி சூடுபிடிக்கத் தொடங்கியுள்ள நிலையில், கூட்டணிக் கணக்குகள் குறித்த அதிரடித் தகவல்கள் வெளியாகியுள்ளன. இதுவரை காய் நகர்த்தல்களை வெளிப்படுத்தாமல் மௌனம் காத்து வந்த தேமுதிக பொதுச்செயலாளர் பிரேமலதா விஜயகாந்த் மற்றும் பாமக நிறுவனர் ராமதாஸ் ஆகியோருடன், திமுக தரப்பில் அமைச்சர் எ.வ.வேலு ரகசியப் பேச்சுவார்த்தை நடத்தியதாகக் கூறப்படுகிறது. இந்தப் பேச்சுவார்த்தையில் தேமுதிகவுக்கு 6 இடங்களும், பாமகவுக்கு 3 இடங்களும் ஒதுக்க முன்மொழியப்பட்டுள்ளதாக அரசியல் வட்டாரங்களில் பரபரப்பாகப் பேசப்படுகிறது.
எண்ணிக்கை அடிப்படையில் இந்த இடங்கள் குறைவாகத் தோன்றினாலும், தேர்தல் செலவுகள் மற்றும் களப்பணிகள் உள்ளிட்ட இதர அம்சங்களில் ஆளுங்கட்சி தரப்பில் “சகலமும் கவனித்துக் கொள்ளப்படும்” என்ற பலமான உத்தரவாதம் அளிக்கப்பட்டதாகத் தெரிகிறது. இந்தத் திடீர் திருப்பம் மற்றும் தேர்தல் வியூகங்கள் காரணமாக, ஆரம்பத்தில் தயக்கம் காட்டிய பிரேமலதாவும், ராமதாஸும் தற்போது திமுகவுடன் கூட்டணி அமைக்கத் தயாராகிவிட்டதாகத் தகவல்கள் கசிகின்றன. இன்னும் சில நாட்களில் இந்த ரகசியப் பேச்சுவார்த்தைகள் அதிகாரப்பூர்வ அறிவிப்பாக மாற வாய்ப்புள்ளதால், தமிழக தேர்தல் களம் இப்போதே உச்சக்கட்ட பரபரப்பை எட்டியுள்ளது.