திமுகவில் இருந்து நீக்கப்பட்ட மு.க.அழகிரியின் ஆதரவாளர்கள், நீண்ட கால காத்திருப்புக்குப் பிறகு தற்போது அதிமுகவில் இணைய முடிவு செய்துள்ளதாக வெளியாகும் தகவல் அரசியல் வட்டாரத்தில் பெரும் பரபரப்பை ஏற்படுத்தியுள்ளது. கடந்த 2014-ஆம் ஆண்டு அழகிரியின் பிறந்தநாளுக்காக ஒட்டப்பட்ட சர்ச்சை போஸ்டர்களால் அவரது தீவிர ஆதரவாளர்கள் கட்சியிலிருந்து நீக்கப்பட்டனர். அவர்களை மீண்டும் கட்சியில் சேர்க்க வேண்டும் என்று அழகிரி பலமுறை தலைமைக்கு கோரிக்கை விடுத்தும், கடந்த 12 ஆண்டுகளாக திமுக தலைமை அதற்கு செவிசாய்க்கவில்லை. தங்களை மீண்டும் அரவணைப்பார்கள் என்ற நம்பிக்கையில் ஒரு தசாப்தத்திற்கும் மேலாக காத்திருந்த இவர்களுக்கு ஏமாற்றமே மிஞ்சிய நிலையில், தற்போது மாற்றுப் பாதையைத் தேடத் தொடங்கியுள்ளனர்.
கட்சியின் புறக்கணிப்பால் அதிருப்தியடைந்துள்ள இவர்கள், “இனிமேலும் பொறுக்க முடியாது” என்ற முடிவுக்கு வந்துள்ளதாகத் தெரிகிறது. இதன் ஒரு பகுதியாக, அதிமுக பொதுச்செயலாளர் எடப்பாடி பழனிசாமியுடன் அழகிரி ஆதரவாளர்கள் ரகசியப் பேச்சுவார்த்தை நடத்தியதாகவும், விரைவில் அவர்கள் அதிகாரப்பூர்வமாக அதிமுகவில் இணையவுள்ளதாகவும் கூறப்படுகிறது. தென் மாவட்டங்களில் இன்னமும் அழகிரிக்கு என்று ஒரு தனி செல்வாக்கு இருக்கும் நிலையில், அவரது ஆதரவாளர்களின் இந்த முடிவு வரவிருக்கும் தேர்தல்களில் திமுகவிற்கு ஒரு பின்னடைவாகவும், அதிமுகவிற்கு கூடுதல் பலமாகவும் அமையும் என்று அரசியல் விமர்சகர்கள் கருதுகின்றனர்.