கர்நாடக மாநிலம் துமகூரு மாவட்டம் மகாவீர் காலனியைச் சேர்ந்த அவினாஷ் (28) என்பவரும், ஹாசன் மாவட்டத்தைச் சேர்ந்த ஒரு பெண்ணும் காதலித்து வந்தனர். இருவீட்டாரின் சம்மதத்துடன் கடந்த 6 மாதங்களுக்கு முன்பு இவர்களுக்குத் திருமணம் நடைபெற்றது. இந்நாட்களில், அப்பெண்ணின் சொந்த ஊரில் கோவில் திருவிழா நடந்ததால், அவர் தன் பெற்றோர் வீட்டிற்குச் சென்றிருந்தார். ஆனால் ஒரு வாரத்திற்கு மேலாகியும் அவர் கணவர் வீட்டிற்குத் திரும்பி வரவில்லை.
மனைவி சரியாகப் பதில் அளிக்காததால், அவினாஷ் தன் பெற்றோருடன் மனைவியின் ஊருக்கு நேரில் சென்று அவரைத் தன்னுடன் குடும்பம் நடத்த அழைத்துள்ளார். ஆனால், அப்பெண் அவினாசுடன் வாழப் பிடிக்கவில்லை என்றும், அவருடன் குடும்பம் நடத்த வர முடியாது என்றும் மறுத்துள்ளார். இதனால் தீவிர மன உளைச்சலுக்கு ஆளான அவினாஷ், வீட்டில் யாரும் இல்லாத நேரத்தில் மின்விசிறியில் சேலையால் தூக்குப் போட்டுத் தற்கொலை செய்து கொண்டார்.
வீட்டிற்கு வந்த பெற்றோர், அவினாஷ் தூக்கில் பிணமாகத் தொங்குவதைக் கண்டு அதிர்ச்சியடைந்து குனிகல் காவல் துறையினருக்குத் தகவல் தெரிவித்தனர். சம்பவ இடத்திற்கு விரைந்து வந்த போலீசார், உடலைக் கைப்பற்றி அரசு மருத்துவமனைக்குப் பிரேதப் பரிசோதனைக்காக அனுப்பி வைத்தனர். மேலும், இச்சம்பவம் குறித்து வழக்குப்பதிவு செய்து விசாரணை மேற்கொண்டு வருகின்றனர்.