20 ஆண்டுகால நரகம்… கணவனின் ஆணுறுப்பை அறுத்து சாக்கடையில் வீசிய மனைவி… கோபியில் நடந்த நள்ளிரவு பயங்கரம்…!

ஈரோடு மாவட்டம் கோபிசெட்டிபாளையம் அருகே உள்ள பிச்சாண்டாம்பாளையத்தில், லாரி ஓட்டுநரான தங்கராஜ் என்பவர் தனது மனைவி அமுதாவால் கொடூரமாகக் கொலை செய்யப்பட்ட சம்பவம் அப்பகுதியில் பெரும் அதிர்ச்சியை ஏற்படுத்தியுள்ளது. கடந்த 20 ஆண்டுகளுக்கு முன்பு காதலித்து திருமணம் செய்துகொண்ட இந்தத் தம்பதியினருக்கு இரண்டு பிள்ளைகள் உள்ளனர். திருமணமான நாள் முதலே மதுப்பழக்கத்திற்கு அடிமையான தங்கராஜ், போதை தலைக்கேறிய நிலையில் தனது மனைவி, தாய் மற்றும் பிள்ளைகளைத் தொடர்ந்து சித்திரவதை செய்து வந்ததாகக் கூறப்படுகிறது.

ஆண்டுக் கணக்கில் நீடித்த இந்த வன்முறை, நேற்று இரவு உச்சகட்டத்தை எட்டியுள்ளது. மதுபோதையில் வீட்டிற்கு வந்த தங்கராஜ், தனது குடும்பத்தினரைச் சரமாரியாகத் தாக்கியுள்ளார். 20 ஆண்டுகாலத் துயரமும், அன்றைய தினத்தின் ஆத்திரமும் அமுதாவை விபரீத முடிவெடுக்கத் தூண்டியுள்ளது. கணவன் குடித்துவிட்டு மீதம் வைத்திருந்த மதுவை தாமும் அருந்திய அமுதா, போதையில் இருந்த தங்கராஜை வீட்டில் இருந்த அரிவாளால் ஆவேசமாக வெட்டியுள்ளார். இதில் ரத்த வெள்ளத்தில் சரிந்த தங்கராஜ் சம்பவ இடத்திலேயே பரிதாபமாக உயிரிழந்தார்.

ஆத்திரம் அடங்காத அமுதா, உயிரிழந்த கணவனின் ஆணுறுப்பைத் தனியாக அறுத்து எடுத்து வீட்டின் அருகே இருந்த சாக்கடையில் வீசியுள்ளார். தங்கராஜின் அலறல் சத்தம் கேட்டு ஓடிவந்த அவரது பெற்றோர், மகன் ரத்தக் காயங்களுடன் பிணமாகக் கிடப்பதையும், அமுதா கையில் அரிவாளுடன் அமர்ந்திருப்பதையும் கண்டு அதிர்ச்சியில் உறைந்து போயினர். இந்தச் சம்பவம் காட்டுத்தீ போல பரவியதையடுத்து, அப்பகுதி மக்கள் அங்கு திரண்டதால் பெரும் பதற்றம் நிலவியது.

தகவலறிந்து விரைந்து வந்த கோபிசெட்டிபாளையம் டி.எஸ்.பி சீனிவாசன் தலைமையிலான போலீசார், தங்கராஜின் உடலைக் கைப்பற்றி உடற்கூறு ஆய்வுக்காக அரசு மருத்துவமனைக்கு அனுப்பி வைத்தனர். சம்பவ இடத்திலேயே இருந்த அமுதாவைக் கைது செய்த போலீசார், அவர் மீது கொலை வழக்குப் பதிவு செய்து விசாரணை நடத்தி வருகின்றனர். மதுப்பழக்கத்தால் ஏற்பட்ட குடும்பத் தகராறு, இரு உயிர்களைச் சிதைத்ததோடு ஒரு குடும்பத்தையே நடுத்தெருவில் நிறுத்தியுள்ள இந்தச் சம்பவம் அப்பகுதி மக்களிடையே பெரும் சோகத்தை ஏற்படுத்தியுள்ளது.