“எல்லாரையும் கொன்னுடுவேன்”… மிளகாய் பொடி தூவி அடித்துக் கொலை… மரத்தில் கட்டி வைக்கப்பட்ட சடலம்…. மனைவி செய்த உச்சக்கட்ட கொடூரம்…!

தெலுங்கானா மாநிலம் சித்திபெட் பகுதியில், குடும்பத் தகராறு காரணமாக மனைவியே தனது கணவரை மரத்தில் கட்டிவைத்து தாக்கியதில் அவர் பரிதாபமாக உயிரிழந்த சம்பவம் அப்பகுதியில் பெரும் அதிர்ச்சியை ஏற்படுத்தியுள்ளது. சித்திபெட்டைச் சேர்ந்த ராஜேஸ்வரி என்பவருக்கும், நர்மெட்டா மண்டலத்தைச் சேர்ந்த 43 வயதுடைய பானோத்து பகவான் என்பவருக்கும் சில ஆண்டுகளுக்கு முன்பு இரண்டாவது திருமணம் நடைபெற்றது. இவர்களுக்கு இரண்டு மகள்களும், ராஜேஸ்வரியின் முதல் கணவர் வழியிலான ஒரு மகளும் உடன் வசித்து வந்தனர்.

தங்கள் குடும்பத்திற்குள் சொத்துப் பகிர்வு தொடர்பாக ராஜேஸ்வரிக்கும் பகவானுக்கும் இடையே அடிக்கடி தகராறுகள் ஏற்பட்டு வந்துள்ளன. குறிப்பாக, முதல் கணவருக்குச் சொந்தமான சொத்துக்களைத் தனது மூன்று மகள்களுக்கும் பிரித்துத் தருமாறு பகவான் வற்புறுத்தியுள்ளார். இதற்கு ராஜேஸ்வரி மறுப்பு தெரிவித்ததால், இருவருக்கும் இடையே கடுமையான வாக்குவாதங்களும் முரண்பாடுகளும் உச்சகட்டத்தை எட்டியுள்ளன.

இந்த விவகாரத்தில் ஆத்திரமடைந்த ராஜேஸ்வரி தனது தாய் வீட்டிற்குச் சென்றிருந்த நிலையில், கடந்த அக்டோபர் 11 அன்று அங்கு சென்ற பகவான் கத்தியைக் காட்டி அனைவரையும் கொன்றுவிடுவதாக மிரட்டியுள்ளார். இதனால் கடும் கோபமடைந்த ராஜேஸ்வரி, அங்கிருந்த மிளகாய்ப் பொடியைக் கணவரின் முகத்தில் தூவி, பின்னர் கயிற்றால் அருகிலுள்ள மரத்தில் கட்டிவைத்து கட்டையால் தாக்கியதாகக் கூறப்படுகிறது.

இந்தத் தாக்குதலில் பலத்த காயமடைந்த பகவான் சம்பவ இடத்திலேயே உயிரிழந்தார். தகவல் அறிந்து விரைந்து வந்த காவல் துறையினர் உடலைக் கைப்பற்றி வழக்குப் பதிவு செய்துள்ளனர். மேலும், குடும்பத் தகராறின் உண்மையான பின்னணி மற்றும் கொலைக்கான காரணங்கள் குறித்து தீவிர விசாரணை நடத்தி வருகின்றனர்.