கோவை மாவட்டம் அன்னூர் அருகேயுள்ள மூக்கனூர் பகுதியைச் சேர்ந்த கைத்தறி நெசவாளர் ரமேஷ் என்பவருக்குத் தொடர்ந்து மது அருந்தும் பழக்கம் இருந்ததால், அவருக்கும் அவரது மனைவி சசிபிரியாவுக்கும் இடையே குடும்பத் தகராறு ஏற்பட்டு வந்துள்ளது. அண்மையில், விடிய விடிய மது குடித்த ரமேஷ், மீண்டும் குடிக்கத் தன்னிடம் பணம் கேட்டு மனைவியைக் கடுமையாக அடித்துத் துன்புறுத்தியுள்ளார். இதனால் எல்லையற்ற ஆத்திரமடைந்த சசிபிரியா, தான் அணிந்திருந்த துப்பட்டாவால் கணவரின் கழுத்தை இறுக்கியதுடன், அவரது வாய் மற்றும் மூக்கைப் பொத்தி படுக்கையில் தள்ளியுள்ளார். இதில் மூச்சுத்திணறிய ரமேஷ் சம்பவ இடத்திலேயே பரிதாபமாக உயிரிழந்தார்.
கொலையை மறைப்பதற்காகத் தனது கணவருக்கு உடல்நிலை சரியில்லை என்று உறவினர்களுக்குச் சசிபிரியா நாடகமாடியுள்ளார். எனினும், உடலை பரிசோதனை செய்த ஆரம்ப சுகாதார நிலைய மருத்துவர், ரமேஷின் முகம் மற்றும் கழுத்துப் பகுதியில் கீறல் காயங்கள் இருப்பதைக் கண்டறிந்து சுட்டிக்காட்டினார். இதனால் சந்தேகமடைந்த ரமேஷின் அண்ணன் காவல் நிலையத்தில் புகாரளிக்க, அன்னூர் போலீசார் சசிபிரியாவைத் தனிப்படை அமைத்துத் தீவிரமாக விசாரித்தனர். அப்போது அவர் உண்மையை ஒப்புக்கொண்டதால், சந்தேக மரணக் கேஸை கொலை வழக்காக மாற்றிய காவல் துறையினர், சசிபிரியாவைக் கைது செய்து கோவை மத்திய சிறையில் அடைத்தனர்.