“டெல்லி வாங்க… பதவி தரோம்னு அமித் ஷா சொன்னார்….. அதற்கு என்ன சொன்னேன் தெரியுமா?”…. முதல்முறையாக மனம் திறந்த அண்ணாமலை….!

தமிழக பாஜகவின் முன்னாள் தலைவரான அண்ணாமலை, கட்சியில் இருந்து தான் விலகியதற்கான உண்மையான காரணங்கள் குறித்து ஆங்கில ஊடக நிகழ்வு ஒன்றில் விரிவாகப் பேசியுள்ளார். 2020-இல் பாஜகவில் இணைந்த அவருக்கு, 2021-இல் மாநிலத் தலைவர் பொறுப்பு வழங்கப்பட்டு, 2025 வரை தொடர்ந்து 5 ஆண்டுகள் அப்பதவியில் நீடித்தார். இதன் பின்னர், கடந்த ஜூன் மாதம் கட்சியை விட்டு வெளியேறிய அவர், ‘வீ தி லீடர்ஸ்’ எனும் புதிய இயக்கத்தைத் தொடங்கிச் செயல்பட்டு வருகிறார். இந்நிலையில்தான், இந்த முடிவு திடீரென எடுக்கப்பட்டதல்ல என்றும், தேசியத் தலைமையுடன் நீண்டகாலமாக விவாதிக்கப்பட்ட ஒன்று என்றும் அவர் சுட்டிக்காட்டியுள்ளார்.

பாஜகவிலிருந்து விலகியதற்கு டெல்லியை மையமாகக் கொண்ட முடிவெடுக்கும் முறையே மிக முக்கியக் காரணம் என்று அண்ணாமலை குறிப்பிட்டுள்ளார். மாநில அளவிலான முடிவுகளை எடுக்கும் அதிகாரம் அந்தந்த மாநிலத் தலைவர்களுக்கே வழங்கப்பட வேண்டும் என வலியுறுத்திய அவர், தமிழக பாஜகவின் முக்கிய ஆலோசனைக் கூட்டம் டெல்லியில் உள்துறை அமைச்சர் இல்லத்தில் நடத்தப்பட்டதில் தனக்குக் கடும் அதிருப்தி இருந்ததாகத் தெரிவித்தார். தமிழகத்திற்கான முடிவுகள் தமிழக மண்ணில் இருந்தே எடுக்கப்பட வேண்டும் என்றும், டெல்லியிலிருந்து தேசியப் பார்வையில் ஒரு மாநிலத்தின் அரசியலை அணுகுவது எல்லா நேரங்களிலும் பலன் தராது என்றும் அவர் தெளிவுபடுத்தியுள்ளார்.

கட்சியின் வாக்கு வங்கி மாற்றங்கள் குறித்தும் பேசுகையில், 2024 மக்களவைத் தேர்தலுக்கு முன்னதாக மேற்கொள்ளப்பட்ட நடைப்பயணம் போன்ற தீவிர நடவடிக்கைகளால் பாஜகவின் வாக்கு சதவீதம் கணிசமாக உயர்ந்ததை அவர் நினைவு கூர்ந்தார். ஆனால், 2026 சட்டமன்றத் தேர்தலில் அதிமுகவுடன் கூட்டணி அமைக்கும் முடிவைத் தான் எதிர்த்ததாகவும், தனது விருப்பத்திற்கு மாறாகக் கூட்டணி அமைக்கப்பட்ட பின்னரே வாக்கு சதவீதம் மீண்டும் சரிவைச் சந்தித்ததாகவும் அவர் சுட்டிக்காட்டினார். மாற்றம் விரும்பும் தமிழக இளைஞர்களின் குரல் போதுமான அளவு கேட்கப்படவில்லை என்பதும் அவரது ஆதங்கமாக இருந்தது.

தனது விலகல் குறித்து 2025-ஆம் ஆண்டின் பிற்பகுதியிலேயே தேசியத் தலைமையிடம் தெரிவித்து விட்டதாகக் கூறிய அண்ணாமலை, தேர்தல் வரை தொடருமாறு கேட்டுக்கொள்ளப்பட்டதால் அமைதி காத்ததாகத் தெரிவித்தார். தேர்தல் முடிந்த கையோடு எந்தவித மோதலுமின்றி முறைப்படி வெளியேறியதாகக் குறிப்பிட்ட அவர், டெல்லியில் தங்கி மத்திய அரசுப் பதவிகளை வகிப்பது தனது நோக்கமல்ல என்றும், அடிமட்டத்தில் இருந்து தமிழக மக்களின் தேவைகளுக்கேற்ப ஒரு புதிய அமைப்பை உருவாக்குவதே தனது உண்மையான இலக்கு என்றும் தனது உரையை நிறைவு செய்தார்.