மேற்கு வங்க மாநிலம் பாருய்பூரில் சிறுமி ஒருவர் பாலியல் வன்கொடுமை செய்யப்பட்டு கொலை செய்யப்பட்ட வழக்கில் முக்கிய குற்றவாளியான பிரபாஸ் மொண்டல், புதன்கிழமை அதிகாலை காவல்துறை என்கவுண்டரில் சுட்டுக் கொல்லப்பட்டார். சம்பவ இடத்திற்கு விசாரணைக்காகவும் குற்றக் காட்சியை மறுவடிவமைப்பு செய்யவும் அவரை அழைத்துச் சென்றபோது, காவல்துறையினரின் துப்பாக்கியைப் பறித்து அவர் சுட முயன்றதாகவும், அதற்குப் பதிலடியாகப் போலீசார் நடத்திய துப்பாக்கிச் சூட்டில் அவர் உயிரிழந்ததாகவும் பாருய்பூர் காவல் கண்காணிப்பாளர் தெரிவித்துள்ளார். குளத்தில் சிறுமியின் உடல் கண்டெடுக்கப்பட்டதைத் தொடர்ந்து அப்பகுதியில் மக்கள் மத்தியில் பெரும் போராட்டங்களும் கொந்தளிப்பும் நிலவி வந்த நிலையில், இந்த என்கவுண்டர் சம்பவம் அரங்கேறியுள்ளது.
இத்தகைய சூழ்நிலையில், குற்றவாளியான பிரபாஸ் மொண்டலின் தாய் சந்தியா மொண்டல், தனது மகனின் உடலை வாங்க மறுத்து ஒட்டுமொத்த நாட்டையும் உற்று நோக்க வைத்துள்ளார். செய்தி நிறுவனமான ஏ.என்.ஐ-யிடம் பேசிய அவர், “என் மகன் செய்த கொடூரமான குற்றத்திற்கு அவனுக்குத் தகுந்த தண்டனை கிடைத்துள்ளது. அவன் எந்தவொரு நல்ல காரியத்தையும் செய்யவில்லை, எனவே அவனது உடலை நான் வாங்க மாட்டேன், வீட்டிற்கும் கொண்டு வரமாட்டேன்; காவல்துறையினர் அந்த உடலை என்ன வேண்டுமானாலும் செய்து கொள்ளட்டும்” என்று தன் மகனின் செயல்களை முற்றிலுமாகத் துறந்து, நெஞ்சை உலுக்கும் வகையில் உறுதியுடன் தெரிவித்துள்ளார்.