பாகிஸ்தான் தீவிரவாதிகளுடன் வாட்ஸ்அப் தொடர்பு… தந்தையை தூக்க துப்பாக்கி பேரமா?… கர்நாடகாவில் என்.ஐ.ஏ. பிடியில் சிக்கிய BBA வாலிபர்…!

கர்நாடக மாநிலம் பீதர் மாவட்டத்தைச் சேர்ந்த 24 வயதான விஷால் குமார் மேத்ரே என்ற இளைஞரை, பாகிஸ்தானைச் சேர்ந்த பயங்கரவாத சந்தேக நபர்கள் மற்றும் சட்டவிரோத ஆயுதக் கடத்தல் கும்பலுடன் தொடர்பில் இருந்ததாக பீதர் காவல்துறையினர் கைது செய்துள்ளனர். கடந்த அக்டோபர் 2-ஆம் தேதி கட்டக் சின்ச்சோளி காவல் நிலையத்தில் பதிவான எஃப்.ஐ.ஆர்-ன் படி, அவர் வாட்ஸ்அப் மற்றும் இன்ஸ்டாகிராம் மூலமாக ‘ஷாசாத் பாட்டி’ போன்ற தடைசெய்யப்பட்ட அமைப்புகளின் உறுப்பினர்களுடன் பேசியதுடன், இந்தியாவுக்கு எதிரான கருத்துகள் மற்றும் காலிஸ்தான் ஆதரவு வீடியோக்கள் கொண்ட வாட்ஸ்அப் சேனல்களிலும் இணைந்து செயல்பட்டு வந்துள்ளார்.

டிசம்பர் 2025 முதல் மேற்கொள்ளப்பட்ட ரகசிய புலனாய்வு நடவடிக்கையின் அடிப்படையில் இந்த விடியற்காலை கைது நடவடிக்கை மேற்கொள்ளப்பட்டுள்ளது. இந்தியாவின் இறையாண்மைக்கு அச்சுறுத்தல் விளைவித்தல் மற்றும் சட்டவிரோத ஆயுதக் கடத்தல் தொடர்பான தகவல்தொடர்புகள் விஷாலின் மொபைல் போன் ஆய்வில் கண்டறியப்பட்டதாகக் கூறப்படும் நிலையில், அவர் மீது சட்டவிரோத நடவடிக்கைகள் தடுப்புச் சட்டம் மற்றும் பாரதிய நியாய சன்ஹிதா ஆகியவற்றின் கீழ் வழக்குப்பதிவு செய்யப்பட்டு, மேல் விசாரணைக்காக தேசிய புலனாய்வு முகமையிடம் ஒப்படைக்கப்பட்டுள்ளார்.

அதேவேளையில், தனது தந்தை இரண்டாவது திருமணம் செய்துகொண்டு குடும்பச் சொத்தில் பங்கு தராததால் ஏற்பட்ட குடும்பச் சொத்து தகராறில், தந்தையைத் தாக்க ஆயுதம் பெற முயன்றதாகவும் ஒரு கோணத்தில் விசாரணை நடைபெறுகிறது. இருப்பினும், விஷாலின் குடும்பத்தினர் இந்த பயங்கரவாத மற்றும் ஆயுதக் கடத்தல் குற்றச்சாட்டுகளை முற்றிலுமாக மறுத்துள்ளனர். குடும்பச் சொத்து தகராறு காரணமாகவே அவர் மீது பொய் வழக்கு போடப்பட்டுள்ளதாக உறவினர்கள் தெரிவித்துள்ள நிலையில், சமூக வலைதள தொடர்புகள் மற்றும் நிதி பரிவர்த்தனைகள் குறித்து விசாரணை தொடர்ந்து நடைபெற்று வருகிறது.