“கோயிலுக்குள் போட்டோ சூட் நடத்திய திருமண ஜோடி”… போட்டோகிராபர்களை விரட்டி விரட்டி அடித்த கும்பல்…. பின்னணியில் இருக்கும் பகீர் காரணம்…!

கர்நாடக மாநிலம் ஹாசன் மாவட்டத்தில் உள்ள புகழ்பெற்ற பைரவேஸ்வரா கோவிலில், திருமணத்திற்கு முந்தைய புகைப்படப் பிடிப்பு (Pre-wedding shoot) நடத்த வந்த ஒரு ஜோடி மற்றும் அவர்களது புகைப்படக் கலைஞர்கள் மீது ஒரு கும்பல் சரமாரி தாக்குதல் நடத்திய சம்பவம் பெரும் பரபரப்பை ஏற்படுத்தியுள்ளது. இந்த எழில்மிகு கோவில் புகைப்படம் எடுப்பதற்குப் பிரபலமான இடமாகத் திகழ்வதால், அங்கு வந்திருந்த ஜோடி தங்கள் வாழ்வின் முக்கிய தருணங்களைப் பதிவு செய்ய முயன்றபோது இந்த அசம்பாவிதம் நிகழ்ந்துள்ளது.

புகைப்படம் எடுத்துக் கொண்டிருந்தபோது, அங்கு வந்த ஒரு கும்பல் கோவில் வளாகத்திற்குள் போட்டோ சூட் நடத்தக் கடும் எதிர்ப்பு தெரிவித்தது. குறிப்பாக, புகைப்படக் கலைஞர்கள் காலணி அணிந்து கொண்டு புனிதமான இடத்திற்குள் நுழைந்ததாகக் குற்றம் சாட்டி வாக்குவாதத்தில் ஈடுபட்டனர். இந்த வாக்குவாதம் விரைவில் வன்முறையாக மாற, அந்தக் கும்பல் புகைப்படக் கலைஞர்களைக் கடுமையாகத் தாக்கியதுடன், அவர்களது விலை உயர்ந்த கேமராக்களையும் சேதப்படுத்தியதாகத் தெரிகிறது.

இந்தத் தாக்குதலில் காயமடைந்த நவி மற்றும் நந்தன் ஆகிய புகைப்படக் கலைஞர்கள் சிகிச்சைக்காகச் சக்லேஷ்பூர் தாலுகா மருத்துவமனையில் அனுமதிக்கப்பட்டுள்ளனர். இச்சம்பவம் குறித்துத் தகவல் அறிந்து விரைந்து வந்த காவல்துறையினர், வன்முறையில் ஈடுபட்ட ஆஷி, பிரசாந்த் உள்ளிட்ட ஏழு பேரைக் கைது செய்து வழக்குப் பதிவு செய்துள்ளனர். புனித தலங்களில் புகைப்படம் எடுப்பது தொடர்பான மோதல்கள் அதிகரித்து வரும் நிலையில், இச்சம்பவம் அப்பகுதியில் பெரும் அதிர்ச்சியை ஏற்படுத்தியுள்ளது.