‘பழங்களின் ராஜா’ என்று அழைக்கப்படும் மாம்பழங்களைச் செயற்கையாகப் பழுக்க வைக்கப் பயன்படுத்தப்படும் நச்சு இரசாயனங்களைக் கண்டறிய, எலுமிச்சைத் துண்டைப் பயன்படுத்தும் ஒரு வீடியோ சமூக வலைதளங்களில் வைரலாகி வருகிறது. அந்த வீடியோவில், மாம்பழத்தின் மீது எலுமிச்சையைத் தேய்க்கும்போது அதன் தோல் ஊதா அல்லது கருப்பு நிறமாக மாறினால், அது ‘கால்சியம் கார்பைடு’ மூலம் பழுக்க வைக்கப்பட்டது என்று கூறப்படுகிறது. நிறம் மாறவில்லை என்றால் அது இயற்கையானது எனக் குறிப்பிடப்படுகிறது. கால்சியம் கார்பைடு என்பது புற்றுநோய் மற்றும் வயிற்று உபாதைகளை ஏற்படுத்தக்கூடிய ஒரு மெதுவான விஷம் என்பதால், இந்த வீடியோ மக்களிடையே அச்சத்தை ஏற்படுத்தியுள்ளது.
இருப்பினும், இந்த எலுமிச்சைச் சோதனை 100% துல்லியமானது அல்ல என்று நிபுணர்கள் எச்சரிக்கின்றனர். எலுமிச்சையில் உள்ள சிட்ரிக் அமிலம், மாம்பழத் தோலில் உள்ள பூச்சிக்கொல்லிகள் அல்லது இயற்கையான ஃபீனால் சேர்மங்களுடன் வினைபுரியும்போதும் (Oxidation) இத்தகைய நிற மாற்றம் ஏற்படக்கூடும். எனவே, நிறம் மாறும் எல்லா மாம்பழங்களும் இரசாயனம் கலந்தவை என்று முடிவெடுக்க முடியாது. அதேசமயம், செயற்கையாகப் பழுக்க வைக்கும் முறைகள் ஆரோக்கியத்திற்குத் தீங்கு விளைவிக்கும் என்பதில் மாற்றுக்கருத்து இல்லை.
செயற்கை மாம்பழங்களை அடையாளம் காண ‘நீர் சோதனை’ (Water Test) மிகவும் நம்பகமானதாகக் கருதப்படுகிறது. மாம்பழங்களை ஒரு வாளித் தண்ணீரில் போடும்போது, அவை அடியில் மூழ்கினால் இயற்கையாகப் பழுத்தவை என்றும், மேலே மிதந்தால் அவை இரசாயனங்கள் மூலம் பழுக்க வைக்கப்பட்டவை என்றும் கண்டறியலாம். மேலும், மாம்பழங்களைச் சாப்பிடுவதற்கு முன்பு சிறிது நேரம் தண்ணீரில் ஊற வைப்பது, அதன் மேற்பரப்பில் உள்ள இரசாயனங்களை அகற்றுவதுடன் மாம்பழத்தின் இயற்கையான வெப்பத்தையும் குறைக்க உதவும்.