விருதுநகர் நாடாளுமன்ற உறுப்பினர் மாணிக்கம் தாகூர், தான் அடுத்த மக்களவைத் தேர்தலில் போட்டியிடப் போவதில்லை என்று அதிரடியாக அறிவித்துள்ளார். மதுரையில் நடைபெற்ற காங்கிரஸ் கட்சி நிர்வாகிகள் கூட்டத்தில் பேசிய அவர், கூட்டணி கட்சிகளிடையே நிலவும் மரியாதை குறைவான போக்கு குறித்து தனது ஆதங்கத்தை வெளிப்படுத்தினார். இந்த அறிவிப்பு தமிழக அரசியல் வட்டாரத்தில், குறிப்பாக காங்கிரஸ் – திமுக கூட்டணியில் பெரும் பரபரப்பை ஏற்படுத்தியுள்ளது.
திமுக மாவட்டச் செயலாளர்கள் மற்றும் அமைச்சர்கள் காங்கிரஸை மட்டம் தட்டிப் பேசுவதாகக் குற்றம் சாட்டிய மாணிக்கம் தாகூர், தன்மானமே தனக்கு முக்கியம் என்று குறிப்பிட்டார். திமுக நிர்வாகி கோ.தளபதி காங்கிரஸைப் பற்றிப் பேசியதற்கு இதுவரை எந்த நடவடிக்கையும் எடுக்கப்படாதது வருத்தமளிப்பதாகத் தெரிவித்த அவர், மரியாதை இல்லாத இடத்தில் பதவிகள் தனக்குப் பொருட்டல்ல என்று ஆவேசமாகப் பேசினார்.
அடுத்த தேர்தலில் போட்டியிடுவது குறித்த கேள்விக்கு பதிலளித்த அவர், “நான் அடுத்த முறை எம்பி தேர்தலில் போட்டியிடப் போவதில்லை; எம்பி, எம்எல்ஏ பதவிகள் எல்லாம் எனக்கு மண்ணாங்கட்டிக்குச் சமம்” என்று காரசாரமாகக் குறிப்பிட்டார். ராகுல் காந்தி கேட்டுக்கொண்டதாலேயே தான் தேர்தலில் போட்டியிட்டதாகவும், பதவிக்காக ஒருபோதும் தான் யாரிடமும் கமிஷன் வாங்கியது கிடையாது என்றும் அவர் திட்டவட்டமாகத் தெரிவித்தார்.
தனது இறுதி மூச்சு வரை காங்கிரஸ்காரனாகவே இருப்பேன் என்று கூறிய மாணிக்கம் தாகூர், கட்சிக்குக் கிடைக்க வேண்டிய முறையான மரியாதையை மட்டுமே எதிர்பார்ப்பதாகக் கூறினார். கூட்டணி தர்மத்தை மதித்து காங்கிரஸ் பொறுமை காப்பதாகவும், ஆனால் அது பலவீனம் அல்ல என்றும் அவர் தனது உரையில் எச்சரிக்கும் தொனியில் சுட்டிக்காட்டினார். இவரது இந்த அதிரடி முடிவு வரும் தேர்தலுக்கான தொகுதிப் பங்கீட்டுப் பேச்சுவார்த்தையில் புதிய திருப்பத்தை ஏற்படுத்தும் என எதிர்பார்க்கப்படுகிறது.