கப்பல் மாவட்டம் கங்காவதி தாலுகாவில் உள்ள அரளா கிராமத்தில் நடைபெற்ற விநாயகர் ஊர்வலத்தின் போது ஏற்பட்ட தகராறில், மூன்று பேர் கத்தியால் குத்தப்பட்டு காயம் அடைந்தனர். இதில் காயமடைந்தவர்கள் ஜெயபிரகாஷ், குருபிரகாஷ் மற்றும் தொடங்கபசவா என அடையாளம் காணப்பட்டுள்ளனர். தொடங்கபசவா கங்காவதி மருத்துவமனையில் சிகிச்சை பெற்று வரும் நிலையில், கடுமையான வயிற்றுக் காயமடைந்த ஜெயபிரகாஷ் மற்றும் குருபிரகாஷ் மேல் சிகிச்சைக்காக கொப்பள் மாவட்ட மருத்துவமனைக்கு மாற்றப்பட்டுள்ளனர்.
ஞாயிற்றுக்கிழமை நடைபெற்ற விநாயகர் ஊர்வலத்தின் போது, டி.ஜே ஒலிபெருக்கி பொருத்தப்பட்ட வாகனத்தின் மீது சிலர் நடனமாடிக் கொண்டிருந்தனர். பாதுகாப்பு காரணங்களைக் கூறி, அவர்களை வாகனத்தில் இருந்து இறங்குமாறு ஜெயபிரகாஷ் உள்ளிட்டோர் கேட்டுக்கொண்டதால் இரு பிரிவினரிடையே வாக்குவாதம் ஏற்பட்டுள்ளது. இதனால் ஆத்திரமடைந்த இளைஞர்கள் சிலர், திங்கள்கிழமை மீண்டும் ஜெயபிரகாஷ் மற்றும் அவரது குழுவினருடன் தகராறில் ஈடுபட்டுள்ளனர்.
இந்த வாக்குவாதம் முற்றிய நிலையில், எதிர்தரப்பினர் மூன்று பேரையும் கத்தியால் தாக்கிவிட்டு தப்பி ஓடியுள்ளனர். இச்சம்பவம் தொடர்பாக கங்காவதி கிராமப்புற போலீசார் வழக்குப்பதிவு செய்து விசாரணை நடத்தி வருகின்றனர். மேலும், இந்தத் தாக்குதலில் ஈடுபட்ட நபர்களை அடையாளம் கண்டு பிடிப்பதற்கான நடவடிக்கைகளில் தீவிரமாக ஈடுபட்டு வருகின்றனர்.
