வேலூர் தொரப்பாடி பாலாஜி நகர் பகுதியைச் சேர்ந்த இளைஞர்கள், விநாயகர் சதுர்த்தி விழாவை முன்னிட்டு ஆன்மீகத்தோடு சமூக விழிப்புணர்வையும் புகுத்தும் வகையில் ஒரு வித்தியாசமான முயற்சியை மேற்கொண்டுள்ளனர். நாட்டின் எதிர்காலத்தைத் தீர்மானிக்கும் வாக்களிப்பதன் அவசியத்தை மக்களுக்கு உணர்த்தும் நோக்கில், அரசுப் பள்ளி வாக்குச்சாவடி வடிவில் விநாயகர் பந்தலை அமைத்துள்ளனர்.
தேர்தல் காலத்தில் அரசுப் பள்ளிகள் வாக்குச்சாவடிகளாக மாறும் சூழலை அச்சு அசலாகப் பிரதிபலிக்கும் வகையில் இந்தப் பந்தலின் முகப்புத் தோற்றம் வடிவமைக்கப்பட்டுள்ளது. மேலும், இங்கு பிரதிஷ்டை செய்யப்பட்டுள்ள விநாயகர் சிலை, பொதுமக்கள் வரிசையில் நின்று வாக்களிப்பதை மேற்பார்வையிடுவது போலவும், வாக்களித்ததன் அடையாளமாக அவரது விரலில் மை வைக்கப்பட்டது போலவும் மிக நேர்த்தியாக உருவாக்கப்பட்டுள்ளது.
திருவிழா கொண்டாட்டத்தை வெறும் பொழுதுபோக்காக மட்டும் விட்டுவிடாமல், ஒரு ஜனநாயக மற்றும் தேர்தல் விழிப்புணர்வு மையமாக மாற்றிய இந்த இளைஞர்களின் ஆக்கப்பூர்வமான சிந்தனைக்குப் பகுதி மக்களிடமிருந்தும் பக்தர்களிடமிருந்தும் பாராட்டுகள் குவிந்து வருகின்றன.