பெண்களுக்கு அடித்தது ஜாக்பாட்… குடும்பத் தலைவிகளுக்கு ரூ.2500, இலவச சிலிண்டர்கள்… அண்ணன் சீர்’ முதல் ‘சூப்பர் சிக்ஸ்’ வரை, தவெக-வின் அதிரடி வாக்குறுதிகள்…!!!

தமிழக வெற்றிக் கழகத்தின் தலைவரும் நடிகருமான விஜய், மாமல்லபுரத்தில் நடைபெற்ற சர்வதேச மகளிர் தின விழாவில் பங்கேற்று பெண்களுக்கான பல்வேறு அதிரடித் திட்டங்களை அறிவித்துள்ளார். இந்த விழாவில் பேசிய அவர், பெண்களின் பொருளாதாரச் சுமையை குறைக்கும் நோக்கில் ‘அன்னபூரணி சூப்பர் சிக்ஸ்’ திட்டத்தின் கீழ் ஆண்டுக்கு 6 சமையல் எரிவாயு சிலிண்டர்கள் இலவசமாக வழங்கப்படும் என்று தெரிவித்தார்.

மேலும், 60 வயது நிரம்பிய அனைத்து குடும்பத் தலைவிகளுக்கும் ‘மதிப்பு மிகு மகளிர் திட்டம்’ மூலம் மாதம் 2,500 ரூபாய் உதவித்தொகை வழங்கப்படும் என்ற முக்கிய வாக்குறுதியையும் அவர் முன்வைத்துள்ளார். பெண்களின் திருமண வாழ்வு எவ்வித கடன் சுமையுமின்றி அமைய வேண்டும் என்பதற்காக ‘அண்ணன் சீர் திட்டம்’ எனும் புதிய திட்டத்தை விஜய் அறிமுகப்படுத்தினார்.

இத்திட்டத்தின் மூலம் ஒவ்வொரு பெண்ணின் திருமணத்திற்கும் ஒரு பவுன் தங்கம் மற்றும் உயர்தரப் பட்டுச் சேலை வழங்கப்படும் என்று அவர் உறுதியளித்துள்ளார். அரசு வழங்கும் நலத்திட்டங்கள் இலவசங்கள் அல்ல, அவை மக்களின் பணத்தை மக்களுக்கே திருப்பித் தரும் கடமை என்று குறிப்பிட்ட விஜய், பெண்களின் பாதுகாப்பு மற்றும் முன்னேற்றத்திற்கு தனது கட்சி முன்னுரிமை அளிக்கும் என்பதையும் இந்த விழாவின் வாயிலாக உறுதிப்படுத்தியுள்ளார்.