மதுராந்தகத்தில் நடைபெற்ற இடைத்தேர்தல் பிரச்சாரப் பொதுக்கூட்டத்தில், தமிழக வெற்றிக் கழக வேட்பாளர் மரகதம் குமரவேலை ஆதரித்து உரைநிகழ்த்திய முதலமைச்சர் விஜய், ஜெம் வீரமணி மீதான போக்சோ வழக்கு தொடர்பாக எழுப்பிய குற்றச்சாட்டுகள் அரசியல் களத்தில் பெரும் விவாதத்தைக் கிளப்பியுள்ளன. “தமிழகத்தில் பல ஆண்டுகளாகச் சிறுமிகள் சீரழிக்கப்பட்ட விவகாரத்தை முந்தைய திமுக அரசு அமைதியாக மூடி மறைத்தது” என்று சாடிய அவர், தவெக அரசு அமைந்த பிறகே சிறப்புப் புலனாய்வுக் குழு மூலம் நடவடிக்கை எடுக்கப்பட்டு குற்றவாளி சிறையில் அடைக்கப்பட்டதாகக் குறிப்பிட்டார். மேலும், பெண்கள் பாதுகாப்பு குறித்துப் பேசும் திமுக, அதிமுக மற்றும் பாஜக ஆகிய கட்சிகளிடையே ரகசியக் கூட்டு நிலவுவதாகவும் கடுமையாகக் குற்றம்சாட்டினார்.
இருப்பினும், சிறப்புப் புலனாய்வுக் குழுவின் விசாரணையில் உள்ள ஒரு போக்சோ வழக்கைக் முதலமைச்சர் பதவியில் இருக்கும் ஒருவரே தேர்தல் பிரச்சார மேடையில் பேசுவது தகுமா எனப் பல்வேறு தரப்பினரும் கேள்விகளை எழுப்பத் தொடங்கியுள்ளனர். நீதிமன்ற வழிகாட்டுதல்களின்படி விசாரணை தொடர்பான விவரங்களை வெளியில் பேசக் கூடாது என்றும், பாதிக்கப்பட்டவரின் அடையாளத்தைப் பாதுகாக்க வேண்டும் என்றும் உத்தரவிடப்பட்டுள்ள நிலையில், இந்த விவகாரத்தை அரசியல் லாபத்திற்காகக் கையில் எடுப்பது விதிகளுக்குப் புறம்பானது என்ற விமர்சனம் எழுந்துள்ளது.
மூத்த பத்திரிகையாளர் ஷியாம் இது குறித்துக் கூறுகையில், “ஜெம் வீரமணி வழக்கு தொடர்பாக வெளியில் யாரும் கருத்துத் தெரிவிக்கக் கூடாது என்றும், சிறப்புப் புலனாய்வுக் குழு மட்டுமே விளக்கமளிக்க வேண்டும் என்றும் நீதிமன்றம் தெளிவுபடுத்தியுள்ளது. நிலைமை இப்படி இருக்க, இடைத்தேர்தல் பிரச்சாரத்தில் முதலமைச்சர் விஜய் இதை ஒரு பொருட்டாகப் பேசுவது முறையல்ல; இது நீதிமன்றத்தின் கண்டனத்திற்கு உள்ளாகக் கூடும்” என்று எச்சரித்துள்ளார்.
மேலும் தற்போதைய தமிழக அரசியல் சூழல் குறித்துப் பேசிய அவர், ஆட்சி மாற்றம் ஏற்பட்டது மக்கள் மத்தியில் நிலவிய ஒருசில அதிருப்திகளின் வடிகால்தானே தவிர பெரும் அலையினால் அல்ல என்பதைச் சுட்டிக்காட்டினார். விஜய் பிரச்சாரம் செய்த பல தொகுதிகளில் தவெக வெற்றி பெறாததையும், 108 தொகுதிகளில் மட்டுமே வெற்றி பெற்றுள்ளதையும் சுட்டிக்காட்டிய அவர், வரவிருக்கும் இடைத்தேர்தலிலும் அதே போன்றதொரு இழுபறி நிலமையே நீடிக்க வாய்ப்புள்ளதாகத் தெரிவித்துள்ளார்.