தமிழக அரசியல் களம் 2026 சட்டமன்றத் தேர்தலை நோக்கி அனல் பறக்கத் தொடங்கியுள்ளது. ஆட்சியைத் தக்கவைக்க திமுக கூட்டணியும், இழந்த செல்வாக்கை மீட்க அதிமுக மற்றும் பாஜக தரப்பும் தீவிரமாகத் தயாராகி வருகின்றன. சீமான் தலைமையிலான நாம் தமிழர் கட்சி ஒருபுறம் வேகம் காட்ட, மறுபுறம் நடிகர் விஜய்யின் தமிழக வெற்றிக் கழகம் மீதான எதிர்பார்ப்பும் விமர்சனங்களும் ஒருசேர எழுந்துள்ளன. விஜய் அரிதாகவே பொதுவெளியில் தோன்றுவதாகவும், அரசியலுக்கும் அவர் ‘கால்ஷீட்’ முறையில் இயங்குவதாகவும் மாற்றுத் திறனாய்வுகள் முன்வைக்கப்படும் சூழலில், அக்கட்சி தற்போது தனது முதல் கட்டப் போராட்டக் களத்தை அறிவித்துள்ளது.
தமிழக வெற்றிக் கழகத்தின் பொதுச் செயலாளர் புஸ்ஸி ஆனந்த் வெளியிட்டுள்ள சமீபத்திய அறிக்கை, அக்கட்சியின் அடுத்தகட்ட நகர்வை உறுதிப்படுத்தியுள்ளது. குறிப்பாக, விகிதாசாரப் பிரதிநிதித்துவத்தை உறுதிப்படுத்தும் வகையில் தமிழக அரசு உடனடியாகச் சாதிவாரி கணக்கெடுப்பு நடத்த வேண்டும் என்ற கோரிக்கையை தவெக முன்வைத்துள்ளது. இது தவிர, தமிழகத்தில் அதிகரித்து வரும் போதைப்பொருள் புழக்கம் மற்றும் சட்டம் ஒழுங்கு சீர்கேடுகளைக் கட்டுப்படுத்தத் தவறியதாக மாநில அரசுக்கு எதிராகக் கடும் கண்டனங்களைப் பதிவு செய்துள்ளது.
விஜய்யின் மக்கள் சந்திப்பு நிகழ்ச்சிகளுக்குக் காவல்துறை மற்றும் அரசு விதித்துள்ள கட்டுப்பாடுகள் அரசியல் காழ்ப்புணர்ச்சி கொண்டது என தவெக சாடியுள்ளது. அரசியல் கட்சிகளுக்கான வழிகாட்டு நெறிமுறைகள் என்ற பெயரில் ஜனநாயகமற்ற முறையில் தடையை உருவாக்குவதாகக் கூறி, அந்த நெறிமுறைகளைத் திரும்பப் பெற வலியுறுத்தியுள்ளனர். தலைவரின் மக்கள் பணிகளை முடக்கும் முயற்சியாகவே இதனைப் பார்ப்பதாக அக்கட்சித் தொண்டர்கள் கருதுகின்றனர்.
இந்தக் கோரிக்கைகளை வலியுறுத்தி, வரும் மார்ச் 12-ஆம் தேதி தமிழகம் முழுவதும் உள்ள அனைத்து மாவட்டத் தலைநகரங்களிலும் மாபெரும் கண்டன ஆர்ப்பாட்டம் நடைபெறும் என அறிவிக்கப்பட்டுள்ளது. தேர்தல் நெருங்கும் வேளையில், தவெக முன்னெடுக்கும் இந்த முதல் நேரடிப் போராட்டம் அரசியல் வட்டாரத்தில் பெரும் உற்றுநோக்கலை ஏற்படுத்தியுள்ளது. விஜய்யின் அரசியல் பயணம் வெறும் சமூக வலைதளத் தரவுகளோடு நின்றுவிடுமா அல்லது களப்போராட்டமாக உருவெடுக்குமா என்பதற்கு இந்த ஆர்ப்பாட்டம் ஒரு வெள்ளோட்டமாக அமையும்.