தமிழக முதலமைச்சராகப் பதவியேற்றுள்ள சி.ஜோசப் விஜய், தனது அரசியல் பயணத்தில் ஆரோக்கியமான நாகரீகத்தைக் கடைப்பிடிக்கும் விதமாகப் பல்வேறு அரசியல் கட்சித் தலைவர்களை நேரில் சந்தித்து வாழ்த்துப் பெற்றுள்ளார். தேர்தலில் அறுதிப் பெரும்பான்மையைப் பெற முடியாத நிலையில், திமுக கூட்டணிக் கட்சிகளின் ஆதரவோடு ஆட்சியமைத்துள்ள அவர், தனது அரசியல் நகர்வுகள் குறித்து எழுந்த சந்தேகங்களுக்கு முற்றுப்புள்ளி வைத்துள்ளார். குறிப்பாக, தேர்தல் களத்தில் கடுமையாக விமர்சித்த முன்னாள் முதலமைச்சர் மு.க.ஸ்டாலின், உதயநிதி ஸ்டாலின், வைகோ, சீமான் மற்றும் அன்புமணி ராமதாஸ் ஆகியோரை நேரில் சந்தித்தது தமிழக அரசியலில் வியப்பை ஏற்படுத்தியுள்ளது.
முன்னாள் முதலமைச்சர் மு.க.ஸ்டாலின் கடைப்பிடித்த அதே அரசியல் நாகரீகத்தை விஜய்யும் தொடர்வாரா என்ற கேள்விக்கு, இந்தச் சந்திப்புகள் மூலம் அவர் விடையளித்துள்ளார். திமுகவையும் அதன் தலைவர்களையும் கடுமையாகச் சாடி அரசியல் செய்த விஜய், நேற்று ஸ்டாலினைச் சந்தித்தபோது, ஸ்டாலின் அவரை இன்முகத்தோடு கைப்பிடித்து அழைத்துச் சென்றது அரசியல் முதிர்ச்சியின் உச்சமாகப் பார்க்கப்படுகிறது. இதற்கிடையே, முதலமைச்சர் விஜய்யின் இந்தச் சந்திப்புகள் குறித்து நடிகை விஜயலட்சுமி வெளியிட்டுள்ள வீடியோ ஒன்று தற்போது பெரும் பரபரப்பை ஏற்படுத்தியுள்ளது.
அந்த வீடியோவில் பேசியுள்ள விஜயலட்சுமி, முதலமைச்சர் விஜய் தனது பரம எதிரியான சீமானைச் சந்தித்ததில் தனக்கு உடன்பாடு இல்லை என்று வெளிப்படையாகத் தெரிவித்துள்ளார். “ஸ்டாலின் மற்றும் வைகோ போன்ற பெரிய தலைவர்களைச் சந்தித்ததில் மகிழ்ச்சி, ஆனால் சீமானைச் சந்தித்தது கவலையளிக்கிறது” என்று கூறிய அவர், தேர்தல் பிரச்சாரத்தில் ஒருவரைத் திட்டிவிட்டுப் பின்னர் நேரில் கட்டிப்பிடிப்பது மக்களுக்குக் குழப்பத்தையே ஏற்படுத்தும் என்று விமர்சித்துள்ளார். மேலும், தன்னையும் தன் அக்காவையும் காப்பாற்றுமாறு விடுத்த கோரிக்கைகளை யாரும் கண்டுகொள்ளவில்லை என்றும் அவர் ஆதங்கம் தெரிவித்துள்ளார்.
தனது எதிரியைச் சந்திப்பவர் யாராக இருந்தாலும் அவரும் எனக்கு எதிரிதான் என்று அதிரடியாகக் கூறியுள்ள விஜயலட்சுமி, இனி வாழ்வோ சாவோ கர்நாடகாவிலேயே பார்த்துக் கொள்கிறேன் என்றும், இதுவே தனது கடைசி வீடியோ என்றும் உருக்கமாகத் தெரிவித்துள்ளார். தமிழகத்தில் வாழ விடுங்கள் எனப் பலமுறை போராடியும், அனைத்து அரசியல் தலைவர்களும் சீமானைச் சந்தித்து ஆதரவு தருவது தனக்கு மனவேதனையைத் தருவதாகக் குறிப்பிட்டுள்ள அவர், தன்னைத் தரக்குறைவாகப் பேசியவர்களுக்கு மக்கள் பாடம் புகட்டுவார்கள் என்று கூறி வீடியோவை முடித்துள்ளார்.