நான் அப்போது பிரபலம் இல்லாத நடிகர்… எனக்காக ஒருமாதம் ஷூட்டிங்கை தள்ளிவைத்தார்- விஜயகாந்த் பற்றி பிரபல நடிகர் பகிர்ந்த சம்பவம்!

தமிழ் சினிமாவில் 80 களிலும், 90 களிலும் மிகப்பெரிய ஆக்‌ஷன் ஹீரோவாக வலம் வந்தவர் விஜயகாந்த். அவர் நடித்த ஊமை விழிகள், கேப்டன் பிரபாகரன், புலன் விசாரணை, வானத்தைப் போல, சின்னக்கவுண்டர் மற்றும் ரமணா உள்ளிட்ட படங்கள் எல்லாம் பிளாக்பஸ்டர் ஹிட்களாக அமைந்தன.

எம் ஜி ஆர் போலவே விஜயகாந்தும் திரையில் நடிக்கும் போது சில கொள்கைகளை கடைபிடித்தார். பெரும்பாலும் மது மற்றும் சிகரெட் குடிக்கும் காட்சிகளில் நடிக்க மறுத்துவிடுவார். அதுபோல பெண்கள் மற்றும் வயதானவர்களை அவமரியாதை செய்வது போலவோ அல்லது அடிப்பது போன்ற காட்சிகளிலோ நடிக்க மாட்டார். அந்தளவுக்கு இமேஜை மெய்ண்டெய்ன் செய்து வந்தார். விஜயகாந்த் கருப்பாக இருந்த காரணத்தால் அவரோடு ஜோடியாக நடிக்க முதலில் நடிகைகள் மறுத்தார்கள்.

ஆனாலும் தனக்கென ஒரு பாணியை உருவாக்கிக் கொண்டு 80 களிலும் 90 களிலும் பிஸியான நடிகராக வலம் வந்தார். 2000 களுக்குப் பிறகு அரசியலுக்கு சென்ற அவர் சினிமாவில் நடிப்பதைக் குறைத்தார். உடல்நலப் பாதிப்பு ஏற்பட்டு கடந்த 2023 ஆம் ஆண்டு மறைந்தார்.

இந்நிலையில் இன்று இந்திய அளவில் அறியப்படும் நடிகராக இருக்கும் சோனு சூட் தன்னுடைய ஆரம்பகாலப் படங்களில் ஒன்றான கள்ளழகர் படத்தில் மறைந்த நடிகர் விஜயகாந்த் உடன் நடித்த அனுபவத்தைப் பகிர்ந்துள்ளார். அதில் “கள்ளழகர் படத்தில் நான் சரியாக இருப்பேன் என விஜயகாந்த் சார் நினைத்தார். எனக்கு அப்போது சினிமாவில் சண்டை போடத் தெரியாது. அதனால் அதைக் கற்றுக்கொள்ளும் வரை எனக்காக அவர் ஒரு மாதம் ஷூட்டிங்கைத் தள்ளிவைத்தார்.

அவருடைய இந்த அன்பால் முதல் படத்திலேயே நான் ராஜ கவனிப்பைப் பெற்றேன். அடுத்தவர்களை எப்படி உபசரிப்பது என்பதை நான் அவரிடம் இருந்துதான் கற்று பின்தொடர்கிறேன். அவர் கடவுளின் குழந்தை.” எனக் கூறியுள்ளார்.