விஜயபாஸ்கர் ‘ஆப்ஷன்’ க்ளோஸ்..? புதுக்கோட்டை அதிமுக அலுவலக சாவியை பிடுங்கிய எடப்பாடி… 15 நாள் மோதல் முடிவுக்கு வந்தது..!!

புதுக்கோட்டை வடக்கு மாவட்ட அ.தி.மு.க. முன்னாள் செயலாளரும், முன்னாள் அமைச்சருமான டாக்டர் சி.விஜயபாஸ்கர் எம்.எல்.ஏ, கட்சியின் பொதுச்செயலாளர் எடப்பாடி பழனிசாமியின் உத்தரவை மீறி, தமிழக வெற்றிக்கழக அரசு மீதான நம்பிக்கை கோரும் வாக்கெடுப்பில் அரசுக்கு ஆதரவாக வாக்களித்தார். இதன் காரணமாக அவரது கட்சிப் பதவி உடனடியாகப் பறிக்கப்பட்டு, புதிய வடக்கு மாவட்ட செயலாளராக பழனிவேல் நியமிக்கப்பட்டார். பழனிவேல் புதுக்கோட்டை அசோக் நகரில் உள்ள மாவட்ட அ.தி.மு.க. அலுவலகத்திற்கு வந்தபோது, விஜயபாஸ்கரின் ஆதரவாளர்கள் திரண்டு பலத்த எதிர்ப்பு தெரிவித்ததால் சட்டம்-ஒழுங்கு பிரச்சனை ஏற்பட்டு, அங்கு கடந்த 15 நாட்களுக்கும் மேலாகப் பலத்த போலீஸ் பாதுகாப்பு போடப்பட்டிருந்தது.

புதிய மாவட்ட செயலாளர் பழனிவேல் அ.தி.மு.க. அலுவலகத்தின் ஆவணங்களை மாவட்ட கலெக்டர் மற்றும் போலீசாரிடம் சமர்ப்பித்து, அலுவலகத்தைத் திறக்க அனுமதி கோரினார். இதனைத் தொடர்ந்து, புதுக்கோட்டை வருவாய் கோட்டாட்சியர் பிரகாஷ் முன்னிலையில் நேற்று இருதரப்பினரையும் அழைத்துச் சமரச பேச்சுவார்த்தை கூட்டம் நடத்தப்பட்டது. இந்தக் கூட்டத்தில் எடப்பாடி பழனிசாமி தரப்பினர் முழுமையாகப் பங்கேற்ற நிலையில், விஜயபாஸ்கர் தரப்பில் ஒரு வழக்கறிஞர் மட்டுமே கலந்து கொண்டதாலும் ஆதரவாளர்கள் வராததாலும் அடுத்தகட்ட பேச்சுவார்த்தை ஒத்திவைக்கப்பட்டது.

வருவாய் கோட்டாட்சியர் அலுவலகத்திற்கு வெளியே திரண்டிருந்த எடப்பாடி பழனிசாமியின் ஆதரவாளர்களும், அ.தி.மு.க. தொண்டர்களும் அலுவலகச் சாவியைத் தங்களிடமே உடனடியாக ஒப்படைக்க வேண்டும் என்று ஆவேசமாக வலியுறுத்தினர். இந்தச் சூழ்நிலையில், நிலவி வந்த பெரும் பரபரப்புக்கு முற்றுப்புள்ளி வைக்கும் விதமாக, புதுக்கோட்டை மாவட்ட அ.தி.மு.க. அலுவலகச் சாவியை அ.தி.மு.க. பொதுச்செயலாளர் எடப்பாடி பழனிசாமி தரப்பிடம் சி.விஜயபாஸ்கர் தரப்பினர் முறைப்படி ஒப்படைத்துள்ளனர்.