“விஜய் ஒரு பச்சைத் தமிழர்.. தவெகவுடன் கூட்டணி”…. ஒரே போடாய் போட்ட வேல்முருகன்… தமிழக அரசியலில் அதிரடி திருப்பம்…!

தமிழக அரசியலில் நீண்டகாலமாக திமுக கூட்டணியில் வன்னியர் சமூகத்தின் முக்கிய முகமாக விளங்கிய தமிழக வாழ்வுரிமை கட்சி (தவாக), தற்போது அக்கூட்டணியில் இருந்து அதிரடியாக வெளியேறியுள்ளது. வரும் சட்டசபைத் தேர்தலில் நெய்வேலி, பண்ருட்டி உள்ளிட்ட 4 தொகுதிகளை வேல்முருகன் கோரியதாகவும், அதனை திமுக தலைமை ஏற்காததே இந்த விரிசலுக்கு முக்கியக் காரணமாகச் சொல்லப்படுகிறது. தனது 10 அம்சக் கோரிக்கைகளை திமுக அரசு கண்டுகொள்ளவில்லை என்று குற்றம் சாட்டியுள்ள வேல்முருகன், இதனால் கூட்டணியிலிருந்து விலகித் தனித்துவமான அரசியல் பாதையைத் தேர்வு செய்துள்ளார்.

திமுகவிலிருந்து வெளியேறிய வேல்முருகன் அதிமுக பக்கம் செல்வார் என எதிர்பார்க்கப்பட்ட நிலையில், பாஜக அங்கம் வகிக்கும் எந்தவொரு கூட்டணியிலும் தான் இணையப் போவதில்லை என்பதில் அவர் உறுதியாக உள்ளார். இது அரசியல் வட்டாரத்தில் பெரும் அதிர்வலைகளை ஏற்படுத்தியுள்ளது. வரும் தேர்தலில் தான் நேரடியாகப் போட்டியிடப் போவதில்லை என்று அறிவித்துள்ள அவர், தனது கட்சியினர் களமிறங்குவார்கள் என்றும், 234 தொகுதிகளிலும் போட்டியிடும் அளவிற்குக் கட்டமைப்பு தவாகவிடம் இருப்பதாகவும் சவால் விடுத்துள்ளார்.

தமிழக வெற்றிக் கழகத் தலைவர் விஜய் குறித்துப் பேசிய வேல்முருகன், அவரை ஒரு “பச்சைத் தமிழர்” என்று வெகுவாகப் பாராட்டியுள்ளார். விஜய் அரசியலுக்கு வந்தபோது வரவேற்ற முதல் அரசியல்வாதி தானே என்று குறிப்பிட்ட அவர், தற்போதைக்கு விஜய்யுடன் கூட்டணி அமைப்பதற்கான வாய்ப்புகள் இல்லை என்பதையும் தெளிவுபடுத்தியுள்ளார். விஜய் இன்னும் மக்கள் பிரச்சினைகளைப் பேச வேண்டும் என்றும், தன்னை யார் வேண்டுமானாலும் சந்திக்கலாம் என்ற எளிய நிலையை அவர் உருவாக்க வேண்டும் என்றும் சில ஆலோசனைகளையும் வேல்முருகன் முன்வைத்துள்ளார்.

எதிர்காலக் கூட்டணி குறித்துப் பேசிய வேல்முருகன், நாம் தமிழர் கட்சி ஒருங்கிணைப்பாளர் சீமானுடன் கைகோர்க்க வாய்ப்புள்ளதாகக் குறிப்பிட்டுள்ளார். மண் மற்றும் மொழிக் கொள்கைகளில் ஒத்த கருத்துள்ளவர்களுடன் இணைந்து, பழைய மனக்கசப்புகளை மறந்து அரசியல் மாற்றத்திற்காகப் பேசத் தயார் என்று அவர் கூறியுள்ளார். திமுக, அதிமுக மற்றும் தேசியக் கட்சிகளுக்குப் பாடம் கற்பிக்க வேட்புமனுத் தாக்கலின் கடைசி நாளில் கூட மிகப்பெரிய அரசியல் மாற்றம் ஏற்பட வாய்ப்புள்ளதாக அவர் சூசகமாகத் தெரிவித்துள்ளார்.