தமிழக முதல்வர் விஜய் இன்று பிற்பகல் ஆந்திர மாநிலம் விஜயவாடாவுக்கு பயணம் மேற்கொண்டு, அம்மாநில முதல்வர் சந்திரபாபு நாயுடுவைச் சந்தித்து முக்கியப் பேச்சுவார்த்தை நடத்த உள்ளார். சென்னையின் குடிநீர் தேவையைப் பூர்த்தி செய்யும் வகையில் ஆந்திர அரசு ஆண்டுதோறும் 12 டிஎம்சி தண்ணீர் வழங்க வேண்டும் என்ற ஒப்பந்தம் உள்ள நிலையில், நடப்பாண்டில் இதுவரை 2.251 டிஎம்சி தண்ணீர் மட்டுமே அளிக்கப்பட்டுள்ளதாகத் தெரிகிறது. இந்த நீர் பற்றாக்குறை மற்றும் கோதாவரி – கிருஷ்ணா – காவிரி நதிநீர் இணைப்புத் திட்டங்களின் தற்போதைய நிலை குறித்து இருவரும் விரிவாக ஆலோசிக்க திட்டமிட்டுள்ளனர்.
இதற்கிடையே, தமிழக எல்லையை நோக்கிப் பாயும் நதிகளின் குறுக்கே ஆந்திர அரசு புதிய அணை கட்டத் திட்டமிட்டுள்ளதாக வெளியாகி இருக்கும் தகவல்கள் தமிழக மக்களிடையே பெரும் கவலையை ஏற்படுத்தியுள்ளன. இந்த விவகாரம் குறித்தும், இரு மாநிலங்களுக்கு இடையிலான நதிநீர் பங்கீட்டுப் பிரச்சனைகள் குறித்தும் சந்திரபாபு நாயுடுவுடன் முதல்வர் விஜய் தீவிரமாக விவாதிக்க உள்ளார். இந்தப் பயணத்தில் தமிழக நீர்வளத்துறை அமைச்சர் புஸ்ஸி ஆனந்தும் உடன் பங்கேற்கிறார் என்பது குறிப்பிடத்தக்கது.
திட்டமிட்ட அட்டவணைப்படி, இன்று மதியம் 2 மணிக்கு சென்னையில் இருந்து விமானம் மூலம் புறப்படும் முதல்வர் விஜய், பிற்பகல் 3.30 மணிக்கு ஆந்திராவின் ஞானாவரம் விமான நிலையத்தைச் சென்றடைகிறார். அதனைத் தொடர்ந்து, மாலை 4.15 மணிக்கு முதல்வர் சந்திரபாபு நாயுடுவைச் சந்தித்து ஆலோசனைகளை நடத்துகிறார். இந்தச் சந்திப்பைத் தொடர்ந்து, ஆந்திர துணை முதல்வர் பவன் கல்யாணையும் சந்தித்து பரஸ்பர விவகாரங்கள் குறித்துப் பேசவுள்ளார்.
அனைத்துப் பேச்சுவார்த்தைகளும் நிறைவடைந்த பிறகு, மாலை 6 மணிக்கு விஜயவாடாவில் அமைந்துள்ள புகழ்பெற்ற கனக துர்கா கோயிலுக்குச் சென்று சாமி தரிசனம் செய்ய உள்ளார். அதனைத் தொடர்ந்து, இரவு 8.30 மணியளவில் அவர் மீண்டும் சென்னைக்குத் திரும்புகிறார். ஏற்கனவே காவிரி விவகாரம் தொடர்பாக கர்நாடகா செல்வதாக இருந்த பயணம் கடைசி நேரத்தில் ரத்து செய்யப்பட்ட நிலையில், விஜயின் இந்த ஆந்திரப் பயணம் அரசியல் மற்றும் நீர்வளப் பாதுகாப்பு வட்டாரத்தில் மிகுந்த எதிர்பார்ப்பை ஏற்படுத்தியுள்ளது.