ஆதவ் அர்ஜுனாவின் ‘செக்-மேட்’.. சைலண்டாக ஒதுங்கிய விஜய்யின் ‘ரைட் ஹேண்ட்’…. தவெக-வில் நடக்கும் அதிகார யுத்தம்….!

தமிழக அரசியலில் புதிய சக்தியாக உருவெடுத்துள்ள நடிகர் விஜய்யின் தமிழக வெற்றிக் கழகம்  தனது முதல் தேர்தலைச் சந்திக்கும் முன்பே உட்கட்சிப் பூசல்களைச் சந்திக்கத் தொடங்கியுள்ளது. குறிப்பாக, விஜய்யின் ‘வலது கை’ என்று கருதப்பட்ட தேர்தல் வியூக வகுப்பாளர் ஜான் ஆரோக்கியசாமிக்கும், சமீபத்தில் கட்சியில் இணைந்த ஆதவ் அர்ஜுனாவுக்கும் இடையே மூண்டுள்ள அதிகார மோதல் தற்போது பகிரங்கமாகத் தெரியத் தொடங்கியுள்ளது. கட்சியின் ஆரம்பக் கால ஆலோசனைகளை வழங்கி வந்த ஜான் ஆரோக்கியசாமி, தற்போது மெல்ல மெல்ல ஓரங்கட்டப்படுவதாக அரசியல் வட்டாரங்களில் பரபரப்பு கிளம்பியுள்ளது.

கட்சியின் கொள்கை முடிவுகள் முதல் நிர்வாகிகளின் பேட்டி வரை அனைத்தையும் தனது கட்டுப்பாட்டில் வைத்திருக்க விரும்பிய ஜான் ஆரோக்கியசாமிக்கு, ஆதவ் அர்ஜுனாவின் வருகை பெரும் சவாலாக அமைந்துள்ளது. விஜய்யின் முழு நம்பிக்கையைப் பெற்றுள்ள ஆதவ் அர்ஜுனா, தற்போது கட்சியின் முக்கிய முடிவுகளில் ஆதிக்கம் செலுத்தத் தொடங்கியுள்ளார். தேர்தல் பணிகளுக்காக உருவாக்கப்பட்ட “வாய்ஸ் ஆப் காமன்ஸ்” அலுவலகத்தில் ஜானின் குழுவினர் இணைந்து பணியாற்ற வேண்டும் என்ற விஜய்யின் விருப்பம் நிறைவேறாத நிலையில், அக்குழுவினர் அங்கிருந்து வெளியேறியது நிர்வாக ரீதியான பிளவை உறுதிப்படுத்தியுள்ளது.

சமீபத்தில் ஆதவ் அர்ஜுனா ஏற்பாடு செய்திருந்த பிரம்மாண்ட விருந்து நிகழ்ச்சியில் கட்சியின் முக்கியப் புள்ளிகள் அனைவரும் பங்கேற்ற நிலையில், ஜான் ஆரோக்கியசாமி மட்டும் அந்த நிகழ்வைத் தவிர்த்தது பெரும் விவாதத்தை ஏற்படுத்தியுள்ளது. ஜான் ஆரோக்கியசாமி தனது கட்டுப்பாட்டில் இல்லாத அதிகார மையத்தை விரும்பாததே இந்த விரிசலுக்குக் காரணம் என்று சொல்லப்படுகிறது. அதேசமயம், ஆதவ் அர்ஜுனாவின் தன்னிச்சையான செயல்பாடுகளும், மேடைப் பேச்சுகளும் விஜய்யை வெகுவாகக் கவர்ந்திருப்பது ஜானுக்குப் பின்னடைவாகக் கருதப்படுகிறது.

தற்போது நிலவும் சூழலைப் பார்க்கும்போது, ஜான் ஆரோக்கியசாமி விரைவில் தவெக முகாமிலிருந்து முழுமையாக விலக வாய்ப்புள்ளதாக அரசியல் நோக்கர்கள் கணிக்கின்றனர். தேர்தல் நெருங்கும் வேளையில், கட்சியின் மிக முக்கியமான வியூக வகுப்பாளர் விலகுவது தவெகவின் வெற்றி வாய்ப்புகளைப் பாதிக்குமா என்ற கவலை தொண்டர்களிடையே எழுந்துள்ளது. விஜய்யின் இந்த அதிரடி மாற்றங்களும், நிர்வாகப் பகிர்வுகளும் வரும் சட்டமன்றத் தேர்தலில் எத்தகைய தாக்கத்தை ஏற்படுத்தும் என்பதைப் பொறுத்திருந்துதான் பார்க்க வேண்டும்.