“அப்படியெல்லாம் தர முடியாது”…. கமலின் 6 கோரிக்கையை ஒற்றை அறிக்கையில் நிராகரித்த விஜய்…. அதிகாரிகள் போட்ட ரகசிய ரிப்போர்ட்….!

திரைத்துறையின் நலன்களை மேம்படுத்தும் நோக்கில், மக்கள் நீதி மய்யத்தின் தலைவரும் நாடாளுமன்ற உறுப்பினருமான கமல்ஹாசன், தமிழக முதல்வர் விஜய்யைச் சந்தித்து 6 முக்கிய கோரிக்கைகளை அண்மையில் முன்வைத்திருந்தார். தமிழக அரசின் சொந்த ஓடிடி (OTT) தளம், கேளிக்கை வரி ரத்து, இணைய திருட்டைத் தடுக்க தனிப்படை, திரைப்பட பட்ஜெட்டில் 10 சதவீத மானியம், ஓடிடி வெளியீட்டிற்கு 8 வாரக் கட்டுப்பாடு மற்றும் தினசரி 5 காட்சிகள் திரையிட அனுமதி ஆகியவையே அந்த கோரிக்கைகள் ஆகும். இந்த மனு குறித்து நிதி மற்றும் வருவாய்த்துறை உள்ளிட்ட உயர் அதிகாரிகளுடன் விரிவாக ஆலோசித்த முதல்வர் விஜய், கோரிக்கைகளின் சாத்தியக்கூறுகள் குறித்து அறிக்கை சமர்ப்பிக்குமாறு உத்தரவிட்டிருந்தார்.

அதிகாரிகள் சமர்ப்பித்த விரிவான அறிக்கையில், கமல்ஹாசனின் பெரும்பாலான கோரிக்கைகள் நடைமுறைக்குச் சாத்தியமற்றவை எனத் தெரிவிக்கப்பட்டுள்ளது. குறிப்பாக, தமிழக அரசே ஓடிடி தளத்தைத் தொடங்குவது மத்திய அரசின் கட்டுப்பாட்டில் உள்ளதோடு, ஏற்கனவே நஷ்டத்தில் இயங்கும் அரசு கேபிள் நிறுவனம் போல மேலும் நிதி நெருக்கடியை உருவாக்கும் எனக் குறிப்பிடப்பட்டுள்ளது. உள்ளாட்சி அமைப்புகளின் வருவாயைப் பாதிக்கும் என்பதால் 4 சதவீத வரியை முழுமையாக ரத்து செய்ய முடியாது என்றும், 100 கோடி பட்ஜெட் படத்திற்கு 10 கோடி ரூபாய் மக்கள் வரிப்பணத்திலிருந்து மானியம் தருவது பெரும் பேராசை என்றும் அதிகாரிகள் சுட்டிக்காட்டியுள்ளனர். மேலும், இணையத் திருட்டைத் தடுக்க தனிப்படை அமைப்பதும், ஓடிடி ஒப்பந்தக் கட்டுப்பாடுகளை அரசு கையாள்வதும் தேவையற்றது என அதிகாரிகள் திட்டவட்டமாகக் கூறியுள்ளனர்.

அதிகாரிகளின் இந்த விளக்க அறிக்கையைப் படித்துப் பார்த்த முதல்வர் விஜய், அதில் உள்ள நியாயங்களை முழுமையாக ஏற்றுக்கொண்டு கமல்ஹாசனின் 5 கோரிக்கைகளை அதிரடியாக நிராகரித்துள்ளார். எனினும், தினசரி 5 காட்சிகள் திரையிட வேண்டும் என்ற கோரிக்கைக்கு மட்டும் நீதிமன்ற உத்தரவுகளைக் கணக்கில் கொண்டு சில நிபந்தனைகளுடன் அனுமதி அளித்துள்ளார். இதன்படி, புதிய திரைப்படங்கள் வெளியாகும் ஆரம்ப நாட்களிலும், வார இறுதி மற்றும் பண்டிகை விடுமுறை நாட்களிலும் மட்டுமே 5 காட்சிகள் திரையிட அனுமதி வழங்கப்படும் என்ற திருத்தத்தோடு ஒப்புதல் வழங்கப்பட்டுள்ளது.

கமல்ஹாசன் திரைத்துறையினரின் நலனுக்காக எடுத்த இந்த முக்கிய முயற்சி, இறுதியில் ஒரே ஒரு கோரிக்கையில் மட்டுமே, அதுவும் மாற்றங்களுடன் பலன் தந்துள்ளதால் கோடம்பாக்கம் வட்டாரங்களில் பெரும் சலசலப்பு ஏற்பட்டுள்ளது. கமலஹாசனின் 5 கோரிக்கைகளை முதல்வர் விஜய் நிராகரித்த விவகாரம் தற்போது தமிழ் சினிமா உலகினரிடையே பரவலான விவாதப் பொருளாக மாறியுள்ளது.