சூப்பர் ஸ்டார் பட்டம் யாருக்கு சொந்தம் – லியோ பட விழாவில் ரசிகர்களுக்கு பதில் சொன்ன விஜய்

நடிகர் விஜய், துவக்கத்தில் இளையதளபதி விஜய் என அழைக்கப்பட்டார். தற்போது தளபதி என அழைக்கப்படுகிறார். இதற்கிடையே, வாரிசு பட விழாவில் பேசிய சிலர், விஜய்தான் இப்போது தமிழ் சினிமாவில் சூப்பர் ஸ்டார் என்று கூற, ஏற்கனவே சூப்பர் ஸ்டார் என ரஜினிகாந்த் அழைக்கப்படும் நிலையில், விஜய் சூப்பர் ஸ்டார் என்ற பட்டம், ரசிகர்களிடையே பரபரப்பை ஏறபடுத்தியது. இதனால் ரஜினி, விஜய் ரசிகர்களிடையே மோதல் போக்கு உருவானது. சமூக வலைதளங்களில் இருதரப்பு ரசிகர்களும் கடுமையான விமர்சித்துக் கொண்டனர்.

இந்நிலையில் ரஜினி நடித்த ஜெயிலர் படத்தின் இசை வெளியீட்டு விழா நிகழ்ச்சியில் பேசிய ரஜினி, காக்கா – கழுகு கதை ஒன்றை சொல்ல, அதில் கழுகு ரஜினி, காக்கா விஜய் என சமூக வலைதளங்களில் பரவி, மேலும் இந்த சூப்பர் ஸ்டார் பிரச்னை விஸ்வரூபம் எடுத்தது. ஜெயிலர் படத்தை விட, லியோ வசூல் சாதனை படைக்க வேண்டும். ரஜினியை விட விஜய் பெரிய நடிகர் என்பதை நிரூபிக்க வேண்டும் என்று, விஜய் ரசிகர்கள் பயங்கர அலப்பரையில் ஈடுபட்டு வந்த நிலையில், இந்த பிரச்னைக்கு லியோ பட வெற்றி விழாவில் முற்றுப்புள்ளி வைத்திருக்கிறார் நடிகர் விஜய்.

லியோ பட விழாவில் விஜய் பேசுகையில், புரட்சி தலைவருன்னா அவர் ஒருத்தர்தான், நடிகர் திலகமுன்னா அவர் ஒருத்தர்தான், புரட்சிக் கலைஞர் கேப்டன்னா அவர் ஒருத்தர்தான், உலகநாயகன்னா அவர் ஒருத்தர்தான், சூப்பர் ஸ்டாருன்னா அவர் ஒருத்தர்தான். தல அப்படின்னா அவர் ஒருத்தர்தான். தளபதிக்கு என்ன அர்த்தம் என்றால், மன்னருக்கு கீழ் அவர் இருப்பார். மன்னர் சொல்லும் ஆணைகளை அவர் செய்து முடிப்பார். என்னை பொருத்த வரை, ரசிகர்களாகிய நீங்கள்தான் என் மன்னர்கள். நான் உங்களுக்கு கீழ இருக்கிற தளபதி. நான் இப்படியே தளபதியாக இருந்து விடுகிறேன். நீங்கள் ஆணையிடுங்க, அந்த வேலையை நான் செஞ்சுவிட்டு போகிறேன், என்று பேசி இருக்கிறார் நடிகர் விஜய்.