திருப்பூரில் நடைபெற்ற தேர்தல் பிரச்சாரக் கூட்டத்தில் தமிழக வெற்றிக் கழகத் தலைவர் விஜய் ஆற்றிய உரை, அரசியல் களத்தில் பெரும் அதிர்வலைகளை ஏற்படுத்தியுள்ளது. கட்சித் தொண்டர்கள் மற்றும் பொதுமக்கள் மத்தியில் பேசிய அவர், வரும் 16-ஆம் தேதி தவெக-வின் முழுமையான தேர்தல் அறிக்கை வெளியாகும் என்று அதிகாரப்பூர்வமாக அறிவித்தார். அதற்கு முன்னதாக, விவசாயம் மற்றும் நெசவுத் தொழிலை மையப்படுத்தி முக்கியமான பல தேர்தல் வாக்குறுதிகளை அவர் முன்வைத்தார்.
விவசாயிகளின் நலனை முன்னிறுத்திப் பேசிய விஜய், தமிழகத்தில் விவசாயக் கடன்கள் முழுமையாக தள்ளுபடி செய்யப்படும் என்று உறுதி அளித்தார். குறிப்பாக, வேளான் கூட்டுறவு வங்கிகளில் பெறப்பட்ட பயிர்க்கடன்கள் அனைத்தும் ரத்து செய்யப்படும் என்றும், ஐந்து ஏக்கருக்கு மேல் நிலம் வைத்திருக்கும் விவசாயிகளுக்கு 50 சதவீத கடன் தள்ளுபடி வழங்கப்படும் என்றும் தெரிவித்தார். மேலும், ‘உழவர்களின் தோழன்’ திட்டத்தின் மூலம் குத்தகை விவசாயிகள் மற்றும் விவசாயத் தொழிலாளர்களுக்கு ஆண்டுக்கு ரூ.10,000 நேரடி முதலீட்டுத் தொகையாக வழங்கப்படும் என்ற அறிவிப்பு விவசாயிகளிடையே வரவேற்பைப் பெற்றுள்ளது.
நெசவாளர் சமூகத்திற்காகப் பல்வேறு அதிரடித் திட்டங்களை விஜய் பட்டியலிட்டார். நெசவாளர்களின் தயாரிப்புகளை சர்வதேச சந்தைக்குக் கொண்டு செல்ல அரசு சார்பில் உலகளாவிய இ-காமர்ஸ் தளம் உருவாக்கப்படும் என்றும், கைத்தறி மற்றும் விசைத்தறி நெசவாளர் குடும்பங்களுக்கு ஆண்டுக்கு ரூ.30,000 நேரடி உதவித்தொகை வழங்கப்படும் என்றும் உறுதியளித்தார். இதனுடன், கைத்தறிக்கு 500 யூனிட் மற்றும் விசைத்தறிக்கு 1,500 யூனிட் இலவச மின்சாரம், நெசவாளர்களுக்கு ரூ.10 லட்சம் ஆயுள் காப்பீடு மற்றும் ஓய்வூதிய உயர்வு போன்ற வாக்குறுதிகளையும் அவர் வழங்கினார்.
அரசு ஊழியர்கள் மற்றும் ஆசிரியர்களின் நீண்டகால கோரிக்கைகளையும் விஜய் தனது உரையில் தொட்டுச் சென்றார். ஐந்து ஆண்டுகளுக்கு மேலாகப் பணியாற்றும் தற்காலிக ஆசிரியர்கள் மற்றும் செவிலியர்கள் பணி நிரந்தரம் செய்யப்படுவார்கள் என்றும், பழைய ஓய்வூதியத் திட்டத்தை மீண்டும் அமல்படுத்துவது குறித்து தீவிரமாகப் பரிசீலிக்கப்படும் என்றும் அவர் தெரிவித்தார். மேலும், காவலர்களின் அடிப்படை ஊதியத்தை ரூ.25,000 ஆக உயர்த்துவது மற்றும் அரசுத் துறை பதவி உயர்வுகளில் நிலவும் ஊழலை ஒழிப்பது போன்ற நிர்வாகச் சீர்திருத்தங்களையும் அவர் தனது பிரச்சாரத்தில் அழுத்தமாகப் பதிவு செய்தார்.