தமிழகத்தில் நடந்து முடிந்த சட்டசபை தேர்தலில் தமிழக வெற்றிக் கழகம் கூட்டணி கட்சிகளின் ஆதரவோடு ஆட்சியை அமைத்தது. இந்நிலையில், காலியாக உள்ள மதுராந்தகம் மற்றும் தாராபுரம் ஆகிய இரு சட்டமன்றத் தொகுதிகளுக்கான இடைத்தேர்தல் வாக்குப்பதிவு சமீபத்தில் நிறைவடைந்துள்ளது. கூட்டணி கட்சிகளின் தயவின்றி தனிப் பெரும்பான்மைக்குத் தேவையான 118 இடங்களை எட்டும் நோக்கில் தவெக காய்நகர்த்தி வரும் சூழலில், இந்த இடைத்தேர்தல் முடிவுகள் அக்கட்சிக்கு மிகவும் முக்கியமான ஒன்றாகப் பார்க்கப்படுகிறது.
இடைத்தேர்தல் முடிவுகளுக்குப் பிறகு தமிழக அமைச்சரவையில் மாற்றம் செய்ய முதல்வர் விஜய் திட்டமிட்டுள்ளதாக நம்பத்தகுந்த வட்டாரங்கள் தெரிவிக்கின்றன. குறிப்பாக, தென்மாவட்டத்தைச் சேர்ந்த பெண் அமைச்சர் ஒருவர் உள்பட மொத்தம் மூன்று அமைச்சர்களின் பதவி பறிக்கப்பட வாய்ப்புள்ளதாகக் கூறப்படுகிறது. சில அமைச்சர்களின் செயல்பாடுகள் திருப்திகரமாக இல்லை என சம்பந்தப்பட்ட துறைகளின் செயலாளர்கள் அளித்த தகவலின் பேரிலேயே முதல்வர் விஜய் இந்த முடிவுக்கு வந்துள்ளதாகத் தெரிகிறது.
நடந்து முடிந்த இடைத்தேர்தலில் வெற்றிபெறும் நபருக்குப் புதியதாக அமைச்சரவையில் வாய்ப்பு வழங்க தவெக தலைமை முடிவு செய்துள்ளதாகக் கூறப்படுகிறது. இதன்மூலம், மாற்றுக்கட்சிகளிலிருந்து மேலும் சில எம்.எல்.ஏ.க்கள் தங்கள் பக்கம் இணையக்கூடும் என்பது கட்சியின் கணக்காக உள்ளது. தற்போதைய அமைச்சரவையில் தொழில்துறை, கால்நடை பராமரிப்பு, பால்வள மேம்பாடு மற்றும் சமூக நலத்துறை ஆகிய துறைகளை நான்கு பெண் அமைச்சர்கள் வகித்து வரும் நிலையில், அதில் ஒருவர் தனது பதவியை இழக்க நேரிடலாம் என எதிர்பார்க்கப்படுகிறது.
வரும் அக்டோபர் 11-ஆம் தேதி வடபழனி மெட்ரோ இரயில் திறப்பு விழாவிற்காக பிரதமர் நரேந்திர மோடி தமிழகம் வரவுள்ளார். அவரது வருகையைத் தொடர்ந்து, அடுத்த வாரத்தில் புதிய அமைச்சரவை மாற்றம் குறித்த அதிகாரப்பூர்வ அறிவிப்புகள் வெளியாகக் கூடும் என்று செயலக வட்டாரங்கள் தெரிவிக்கின்றன. இந்த அமைச்சரவை மாற்றம் தமிழக அரசியல் களத்தில் பெரும் எதிர்பார்ப்பையும் பரபரப்பையும் ஏற்படுத்தியுள்ளது.