தமிழகத்தில் நிலவும் கடுமையான நிதி நெருக்கடி மற்றும் அதிகரித்து வரும் கடன் சுமைக்கு இடையே, மாநிலத்தின் 234 சட்டமன்ற உறுப்பினர்களுக்கும் அரசு சார்பில் புதிய கார்கள் மற்றும் கூடுதல் வசதிகள் வழங்கப்படும் என்று முதலமைச்சர் விஜய் சட்டமன்றத்தில் வெளியிட்ட அறிவிப்பு, அரசியல் களத்தில் பெரும் புயலைக் கிளப்பியுள்ளது. அரசு கருவூலத்தில் போதிய நிதியில்லை எனக் கூறி வெள்ளை அறிக்கை வெளியிடப்பட்ட சூழலில், முக்கியத் தேர்தல் வாக்குறுதிகளை நிறைவேற்ற நிதிப் பற்றாக்குறையைச் சுட்டிக்காட்டும் அரசு, எம்.எல்.ஏ-க்களுக்கு விலையுயர்ந்த வாகனங்கள் வாங்க மட்டும் நிதி ஒதுக்கீடு செய்தது எவ்வாறு என்ற கேள்விகள் பரவலாக எழத் தொடங்கியுள்ளன.
மக்கள் வரிப்பணத்தில் சட்டமன்ற உறுப்பினர்களுக்கு ஆடம்பர வசதிகள் செய்து தரப்படுவதற்கு சோஷியல் மீடியாவிலும் பொதுமக்கள் மத்தியிலும் கடுமையான எதிர்ப்புகள் வெடித்துள்ளன. “பொதுமக்களுக்குச் சேவை செய்ய வாய்ப்புக் கேட்டுத் தேர்தலில் வெல்லும் பிரதிநிதிகள், ஏற்கனவே அரசுச் சம்பளம் பெறும்போது, சொந்தப் பணத்திலோ அல்லது கட்சி நிதியிலோ வாகனங்களை வாங்கிக் கொள்ளாமல் அரசு கஜானாவைப் பயன்படுத்துவது எந்த வகையில் நியாயம்?” என்று சமூக ஆர்வலர்கள் கேள்வி எழுப்புகின்றனர். குறிப்பாக, மகளிர் உரிமைத் தொகை போன்ற அத்தியாவசிய நலத்திட்டங்களைச் செயல்படுத்துவதில் தேக்கம் நிலவும் வேளையில், மக்கள் பணத்தை இப்படி விரயம் செய்வது நியாயமில்லை என்ற கண்டனக் குரல்கள் வலுத்து வருகின்றன.
மற்றொருபுறம், எம்.எல்.ஏ-க்களைத் தன்பக்கம் தக்கவைத்துக்கொள்ளவே இத்தகையச் சலுகை அறிவிக்கப்பட்டுள்ளதா என்ற சந்தேகங்களும் அரசியல் வட்டாரத்தில் எழுந்துள்ளன. அதுமட்டுமன்றி, மாநிலத்தின் வருவாயைப் பெருக்குவதற்காக அமைக்கப்பட்ட உயர்மட்டக் குழுவிடம் எவ்வித ஆலோசனையும் நடத்தப்படாமல் இந்தத் திடீர் அறிவிப்பு வெளியிடப்பட்டது, அந்தக் குழுவின் தலைவருக்கு கடும் வருத்தத்தையும் அதிருப்தியையும் ஏற்படுத்தியுள்ளதாகத் தெரிகிறது. நிதி மேலாண்மை தொடர்பான நிபுணர்களின் ஆலோசனையைப் புறக்கணித்து எடுக்கப்பட்ட இந்த முடிவு, அரசு நிர்வாகத்திற்கு கூடுதல் நெருக்கடியை உருவாக்கியுள்ளது.
இந்தக் கடுமையான விமர்சன அலைகளும், மக்கள் மத்தியில் எழுந்துள்ள அதிருப்தியும் முதலமைச்சர் விஜய்யின் கவனத்திற்குச் சென்றுள்ளதால், அவர் இதுகுறித்து தீவிர யோசனையில் ஆழ்ந்துள்ளதாகக் கூறப்படுகிறது. மக்கள் வரிப்பணத்தைச் சரியான வழியில் பயன்படுத்த வேண்டும் என்ற கோரிக்கை அனைத்துத் தரப்பிலிருந்தும் வலுத்து வரும் நிலையில், இந்தத் தீர்மானம் குறித்து அரசு மீண்டும் பரிசீலனை செய்யுமா அல்லது எதிர்ப்புகளை மீறிச் செயல்படுத்துமா என்ற பரபரப்பான விவாதம் தமிழக அரசியல் களத்தில் சூடுபிடித்துள்ளது.