தமிழக வெற்றிக் கழகத் தலைவர் விஜய் தலைமையிலான புதிய ஆட்சியில், அமைச்சர் சி.டி.ஆர். நிர்மல் குமார் வகிக்கும் மின் மற்றும் சிறைத்துறை பொறுப்புகள் கடும் சர்ச்சைகளைச் சந்தித்துள்ளன. மாநிலம் முழுவதும் தலைவிரித்தாடும் மின்வெட்டுப் பிரச்சனையும், கூடுதல் விலைக்கு மின்சாரம் வாங்கிய விவகாரமும் மக்களையும் தொழில் துறையினரையும் அரசாங்கத்திற்கு எதிராகத் திருப்பியுள்ளன. குறிப்பாக, துணை குடியரசுத் தலைவர் மற்றும் எடப்பாடி பழனிசாமி வருகையின்போது மதுரை மீனாட்சி அம்மன் கோவிலில் ஏற்பட்ட மின் தடை, அரசுக்குத் தேசிய அளவில் தர்மசங்கடத்தை ஏற்படுத்தியது.
இதற்கிடையில், கடந்த வாரம் தேனி சிறையில் இருந்து விசாரணைக் கைதிகள் தப்பிய சம்பவம் தமிழகம் முழுவதும் பெரும் அதிர்வலைகளை ஏற்படுத்தியது. எதிர்க்கட்சிகள் கடுமையான கண்டனங்களைப் பதிவு செய்ததைத் தொடர்ந்து, சிறை பாதுகாப்புக்காகத் தனியாக ஒரு குழு அமைக்கப்பட்டு உயர் அதிகாரிகள் அதிரடியாக மாற்றப்பட்டனர். இருப்பினும், அடுத்தடுத்து சிறைகளில் பாதுகாப்பு நழுவிப் போவது போன்ற தொடர் சம்பவங்கள் சட்டம்-ஒழுங்கு குறித்த கேள்விகளை எழுப்பியுள்ளன.
மதுரையை மையமாகக் கொண்டு தென் மாவட்ட அரசியலில் தனது செல்வாக்கை உயர்த்த சி.டி.ஆர். நிர்மல் குமார் தீவிரமாக முயன்று வருவதாகவும், கட்சியில் புஸ்ஸி ஆனந்திற்கு மாற்றாகத் தனது ஆதரவாளர்களை நிலைநிறுத்த அவர் முற்படுவதாகவும் சக அமைச்சர்கள் தலைமைக்குக் குற்றம் சாட்டியுள்ளனர். மற்ற அமைச்சர்களின் சர்ச்சைப் பேச்சுகளை விட, நிர்மல் குமாரின் துறை சார்ந்த செயல்பாடுகளும் நிர்வாகத் தவறுகளுமே அரசுக்குத் தொடர் கெட்ட பெயரைத் தேடித்தருவதாகக் கோட்டை வட்டாரங்கள் தெரிவிக்கின்றன.
இந்த விவகாரங்களால் அமைச்சர் சி.டி.ஆர். நிர்மல் குமார் மீது முதல்வர் விஜய் கடும் கோபத்தில் உள்ளதாகத் தகவல்கள் வெளியாகி உள்ளன. கட்சிக்குள் நிலவும் கோஷ்டி பூசல்களும், நிர்வாக ரீதியான அடுத்தடுத்த பின்னடைவுகளும் தவெக அரசுக்கு ஆரம்பத்திலேயே பெரும் சோதனையாக மாறியுள்ள சூழலில், முதல்வர் விஜய் என்ன மாதிரியான அதிரடி நடவடிக்கைகளை எடுக்கப் போகிறார் என்ற எதிர்பார்ப்பு அரசியல் அரங்கில் எழுந்துள்ளது.