ஒரே நாளில் ரூ.9 லட்சம் மிச்சம்… சென்னை மாநகராட்சியில் ‘விஜய் மாடல்’ ஓபன் டெண்டர்…. ஒரே அடியில் காலி செய்யப்பட்ட மாஃபியா….!

சென்னை மாநகராட்சியின் டெண்டர் நடைமுறைகளில் கொண்டுவரப்பட்ட திறந்த போட்டி முறை மாற்றம், தொடக்க நிலையிலேயே குறிப்பிடத்தக்க பலனைத் தரத் தொடங்கியுள்ளது. தமிழகத்தில் தவெக அரசுப் பொறுப்பேற்றதைத் தொடர்ந்து, முதலமைச்சர் விஜய் அவர்களின் வழிகாட்டுதலின்படி, வரையறுக்கப்பட்ட டெண்டர் முறைகளுக்குப் பதிலாக வெளிப்படையான திறந்த போட்டி டெண்டர் முறை நடைமுறைப்படுத்தப்பட்டது. இதன் மூலம், மாநகராட்சி நிர்ணயித்த மதிப்பீட்டை விட 25 முதல் 30 சதவீதம் வரை குறைவான விலையில் ஒப்பந்தங்கள் பெறப்பட்டு, பொதுமக்களின் வரிப்பணம் பெருமளவில் சேமிக்கப்பட்டு வருகிறது.

சமீபத்தில் பேருந்து வழித்தடப் பிரிவின் சாலை வெட்டுப் பகுதிகளை சீரமைப்பதற்காக வெளியிடப்பட்ட டெண்டர்களில் இம்மாற்றத்தின் தாக்கம் வெளிப்படையாகத் தெரிந்தது. அம்பத்தூர் மண்டலத்தில் ரூ.25 லட்சம் மதிப்பில் வெளியிடப்பட்ட பணிக்கு 9 ஒப்பந்ததாரர்கள் போட்டியிட்டதில், 25.9 சதவீதம் குறைவாகக் கேட்ட நிறுவனத்திற்கு ரூ.17 லட்சத்தில் ஒப்பந்தம் இறுதி செய்யப்பட்டது. இதனால் ஒரே டெண்டரில் மாநகராட்சிக்கு ரூ.9 லட்சம் மிச்சமாகியுள்ளது. இதேபோல தண்டையார்பேட்டை மண்டலத்திலும் 10-க்கும் மேற்பட்ட நிறுவனங்கள் போட்டியிட்டு குறைந்த விலையைக் குறிப்பிட்டுள்ளன. சோழிங்கநல்லூர் மண்டலத்தில் சில நிறுவனங்கள் 36 சதவீதம் வரை குறைவான விலை கோரியதால், அந்த டெண்டர் அதிகாரிகள் தரப்பில் மறுஆய்வு செய்யப்பட்டு வருகிறது.

கடந்த காலங்களில் அவசரத் தேவை என்ற பெயரில் குறிப்பிட்ட நபர்களுக்கே பணிகள் ஒதுக்கப்பட்டதாகவும், ரூ.25 லட்சம் மதிப்பிலான பணிகளுக்கு ரூ.27.5 லட்சம் வரை செலவிடப்பட்டதாகவும் சென்னை மாநகர ஒப்பந்ததாரர்கள் சங்கத் தலைவர் ராமாராவ் தெரிவித்துள்ளார். தற்போது போட்டி அதிகரித்துள்ளதால் செலவு குறைந்தாலும், 35 சதவீதத்திற்கும் மேல் குறைவான தொகைக்கு ஒப்பந்தம் எடுக்கும் நிறுவனங்கள், செலவைக் குறைக்கப் பணிகளின் தரத்தில் சமரசம் செய்ய வாய்ப்புள்ளதாக அவர் எச்சரித்துள்ளார். உதாரணமாக, தார் தடிமனைக் குறைப்பது போன்ற தவறுகளைத் தடுக்க மாநகராட்சிப் பொறியாளர்கள் நேரடியாக கள ஆய்வு செய்து தரத்தை உறுதி செய்ய வேண்டும் என்றும் அவர் வலியுறுத்தினார்.

நிதிச் சேமிப்புடன் சேர்த்துப் பணிகளின் தரத்தையும் பாதுகாப்பதே தற்போதைய முதன்மை இலக்காக உள்ளது. திட்ட மதிப்பீட்டை விட 30 சதவீதத்திற்கும் குறைவாகக் கேட்கப்படும் டெண்டர்கள் அனைத்தும் தனி ஆய்வுக்கும் கட்டுப்பாடுகளுக்கும் உட்படுத்தப்பட்ட பிறகே இறுதி செய்யப்படுகின்றன என்று மாநகராட்சி அதிகாரிகள் தெரிவிக்கின்றனர். அண்மையில் வெளியிடப்பட்ட சுமார் 150 சிறிய பணிகளுக்கான டெண்டர்களிலும் இப்புதிய முறை தீவிரமாகப் பின்பற்றப்பட்டு வரும் நிலையில், மக்கள் வரிப்பணத்தின் சேமிப்பும் தரமான உள்கட்டமைப்பும் ஒருசேர உறுதி செய்யப்படும் என்ற எதிர்பார்ப்பு நிலவுகிறது.