“வன்னியர்களுக்கு இடமில்லை.. கொங்கு-க்கு முன்னுரிமை”.. தவெக அமைச்சரவையின் பின்னால் இருக்கும் ‘மாஸ்டர் பிளான்’…!

தமிழக அரசியலில் பெரும் எதிர்பார்ப்புக்கு மத்தியில், தமிழக வெற்றிக் கழகத்தின் தலைவர் விஜய் தமிழகத்தின் முதல்வராகப் பொறுப்பேற்றுள்ளார். அவருடன் இணைந்து 9 அமைச்சர்கள் பதவியேற்றுள்ள நிலையில், இந்த அமைச்சரவை பட்டியல் தற்போது அரசியல் தளத்தில் பெரும் விவாதங்களை ஏற்படுத்தியுள்ளது. குறிப்பாக, சமூக ரீதியான பிரதிநிதித்துவத்தில் பல்வேறு சமன்பாடுகளை விஜய் கையாண்டுள்ளார். செங்கோட்டையன், என். ஆனந்த், ஆதவ் அர்ஜுனா, வெங்கடரமணன், நிர்மல் குமார், ராஜ்மோகன், டி.கே. பிரபு, அருண்ராஜ், மற்றும் சிவகாசி கீர்த்தனா ஆகியோர் அமைச்சர்களாகப் பொறுப்பேற்றுள்ளனர்.

இந்த அமைச்சரவையில் மிகவும் ஆச்சரியமான விஷயமாக, கடந்த பல தசாப்த கால திராவிட அரசியலில் அரிதாகக் காணப்படும் பிராமண சமூக பிரதிநிதித்துவம் இடம் பெற்றுள்ளது. வெங்கடரமணனுக்கு அமைச்சரவையில் வாய்ப்பு வழங்கப்பட்டிருப்பது, விஜய் ஒரு புதிய அரசியல் பாதையை முன்னெடுப்பதைக் காட்டுகிறது. அதேபோல், மேற்கு தமிழகத்தில் கட்சியின் வெற்றியை உறுதிப்படுத்தும் நோக்கில் கொங்கு கவுண்டர் சமூகத்தைச் சேர்ந்த செங்கோட்டையன் மற்றும் அருண்ராஜ் ஆகியோருக்கு முக்கியத்துவம் அளிக்கப்பட்டுள்ளது. தென் மாவட்டங்களில் செல்வாக்கு மிக்க முக்குலத்தோர் சமூகத்திலிருந்து நிர்மல் குமார் மற்றும் டி.கே. பிரபு ஆகியோர் அமைச்சர்களாகத் தேர்ந்தெடுக்கப்பட்டுள்ளனர்.

கட்சியின் தொடக்கக் காலத்திலிருந்தே விஜய்யுடன் நெருக்கமாகப் பயணித்த ஆதவ் அர்ஜுனாவிற்கு (ரெட்டியார் சமூகம்) அமைச்சரவையில் இடம் கிடைத்துள்ளது, அவர் கூட்டணிப் பேச்சுவார்த்தைகளில் ஆற்றிய பங்கிற்கு அங்கீகாரமாகக் கருதப்படுகிறது. மேலும், தலித் சமூகத்தைச் சேர்ந்த ராஜ்மோகன் மற்றும் நாடார் சமூகத்தைச் சேர்ந்த சிவகாசி கீர்த்தனா ஆகியோரின் நியமனம் மூலம் சமூக நீதி மற்றும் பெண் பிரதிநிதித்துவத்தை விஜய் உறுதிப்படுத்த முயன்றுள்ளார். எனினும், வடதமிழகத்தில் மிக வலிமையான வாக்கு வங்கியைத் தாரைவார்க்கும் வன்னியர் சமூகத்தைச் சேர்ந்த ஒருவருக்குக் கூட அமைச்சரவையில் இடம் ஒதுக்கப்படாதது பெரும் சர்ச்சையை கிளப்பியுள்ளது.

வடதமிழகத்தில் தவெக சார்பில் 10-க்கும் மேற்பட்ட வன்னியர் சமூகத்தைச் சேர்ந்தவர்கள் வெற்றி பெற்றுள்ள நிலையில், முதல் கட்டப் பட்டியலில் அவர்களுக்கு இடம் அளிக்கப்படாதது அதிருப்தியை ஏற்படுத்தியுள்ளது. இது குறித்து அரசியல் விமர்சகர்கள் விவாதித்து வரும் நிலையில், “இது முதற்கட்ட பட்டியல் மட்டுமே, அடுத்தகட்ட விரிவாக்கத்தில் வன்னியர் சமூகம் உட்பட விடுபட்ட அனைத்து சமூகத்தினருக்கும் உரிய அங்கீகாரம் மற்றும் பிரதிநிதித்துவம் வழங்கப்படும்” என்று தவெக தரப்பில் விளக்கமளிக்கப்பட்டுள்ளது. விஜய்யின் இந்த அடுத்தடுத்த நகர்வுகள் தமிழக அரசியலில் எந்த மாதிரியான தாக்கத்தை ஏற்படுத்தும் என்பதைப் பொறுத்திருந்துதான் பார்க்க வேண்டும்.