“பிரதமர் ரேஸில் மோடி, ராகுல் தான்… விஜய் இல்லவே இல்லை”…. தமிழ்நாட்டை தாண்டினா விஜய்யை யாருக்கு தெரியும்?….. தவெக-வை விளாசிய சுதீஷ்….!

தேமுதிகவைச் சேர்ந்த மாநிலங்களவை உறுப்பினர் எல்.கே. சுதீஷ், வேலூரில் மாவட்ட ஆட்சியர் லீலா அலெக்ஸை நேரில் சந்தித்து தனது நாடாளுமன்ற உறுப்பினர் தொகுதி மேம்பாட்டு நிதி பங்கீடு குறித்து தீவிர ஆலோசனை மேற்கொண்டார். ரூ.5 கோடி தொகுதி நிதியில் குடிநீர், கல்வி உள்ளிட்ட அடிப்படை வசதிகளை நிறைவேற்றுவது குறித்து விவாதித்த அவர், வேலூர் விமான நிலையத்தை விரைவில் பயன்பாட்டிற்கு கொண்டு வர மத்திய அமைச்சரை சந்தித்து வலியுறுத்தியுள்ளதாகத் தெரிவித்தார். இதற்காக மேலும் 100 ஏக்கர் நிலம் கையகப்படுத்த தமிழக முதல்வரைச் சந்திக்க நேரம் கேட்டுள்ளதாகவும், கேந்திரிய வித்யாலயா பள்ளி அமைக்கவும் முயற்சி எடுத்து வருவதாகவும் கூறினார்.

அரசியல் களத்தில் தமிழக அரசு மற்றும் முதல்வர் விஜய்யை எல்.கே. சுதீஷ் கடுமையாகச் சாடினார். மேட்டூர் அணைக்கு நீர் திறக்கச் சென்ற முதல்வரை வரவேற்கச் செல்லும் வழியெல்லாம் வரவேற்புத் தடுப்புகள் அமைத்து மக்கள் வரிப்பணத்தை வீணடித்துள்ளதாகக் கூறி கண்டனம் தெரிவித்தார். மேலும், அனிதா நினைவேந்தல் நிகழ்ச்சிக்கு அரசு அனுமதி மறுத்ததைச் சுட்டிக்காட்டிய அவர், நீட் தேர்வை ரத்து செய்ய வேண்டும் என நாடாளுமன்றத்தில் தாம் குரல் கொடுத்ததாக நினைவு கூர்ந்தார். அதேநேரத்தில், டாஸ்மாக் பணியாளர்களுக்குச் சம்பள உயர்வு வழங்கிய அரசின் நடவடிக்கையைப் பாராட்டி வரவேற்றார்.

தமிழக வெற்றிக் கழகத்தின் வெற்றி எதிர்பாராத ஒன்று எனக் குறிப்பிட்ட அவர், மின்னணு வாக்குப்பதிவு இயந்திரங்கள் மீது தனக்குச் சந்தேகம் இருப்பதாகத் தெரிவித்தார். மேலும், “தமிழ்நாட்டைத் தாண்டி வேறு மாநிலங்களுக்குச் சென்றால் விஜய் யாரென்றே மக்களுக்குத் தெரியாது; பிரதமருக்கான பந்தயத்தில் நரேந்திர மோடியும் ராகுல் காந்தியும் மட்டுமே உள்ளனர். அதனால் பிரதமர் வேட்பாளர் பட்டியலில் விஜய் வர வாய்ப்பே இல்லை” என்று மிகக் காரசாரமாக விமர்சித்தார்.

தொடர்ந்து தவெக அரசின் செயல்பாடுகளை “ஜஸ்ட் பாஸ்” எனச் சித்தரித்த சுதீஷ், சட்டப்பேரவையில் 100 நாட்களைக் கடந்த பின்னரும் அந்தந்த துறை அமைச்சர்கள் பதிலளிக்காமல், மூன்று அமைச்சர்கள் மட்டுமே பதிலளிக்கும் நிலையைச் சுட்டிக்காட்டினார். வரும் காலங்களில் அனைத்து துறை அமைச்சர்களும் சட்டப்பேரவையில் கேள்விக்குப் பதிலளிக்க வேண்டும் என்றும், இது குறித்து தேமுதிக பொதுச்செயலாளர் பிரேமலதாவும் பேரவையில் ஏற்கனவே குரல் கொடுத்துள்ளதையும் அவர் உறுதிபடத் தெரிவித்தார்.