விடுதலை 2 டிரைலரில் இந்த வசனத்தைக் கவனிச்சீங்களா?… யாரா சொல்றாரு வெற்றிமாறன்?- கிளம்பியது சர்ச்சை!

தமிழ் சினிமாவில் இன்றிருக்கும் நம்பிக்கைக்குரிய இயக்குனர்களில் முதன்மையானவராக இருக்கிறார் வெற்றிமாறன். பொல்லாதவன், ஆடுகளம், விசாரணை, வட சென்னை, அசுரன் மற்றும் விடுதலை என குறைவான படங்களையே அவர் இயக்கி இருந்தாலும் அந்த படங்களின் தாக்கம் மிக அதிகமாக இருக்கிறது.

முன்னணி நடிகர்களை வைத்து கதையில் சமாதானங்கள் இல்லாமல் அவர் எடுக்கும் படங்கள் கமர்ஷியலாகவும் வெற்றி பெறுகின்றன. இதனால் அவர் இயக்கத்தில் நடிக்க முன்னணி நடிகர்கள் ஆசைப்படுகிறார்கள். தற்போது விடுதலை -2 படத்தை இயக்கி வரும் வெற்றிமாறன் அடுத்து சூர்யாவை வைத்து வாடிவாசல் படத்தை இயக்கவுள்ளார்.

இந்நிலையில் இப்போது அவர் நான்கு ஆண்டுகளாக உருவாக்கி வரும் விடுதலை படத்தின் இரண்டாம் பாகம் டிசம்பர் 20 ஆம் தேதி ரிலீஸாகவுள்ளது. இதையொட்டி நேற்று படத்தின் டிரைலர் வெளியாகி கவனம் ஈர்த்துள்ளது. ஆனால் டிரைலரில் இடம்பெற்றுள்ள ஒரு வசனம் சர்ச்சையை உருவாக்கிக் கவனம் பெற்றுள்ளது.

டிரைலரில் ஒரு இடத்தில் விஜய் சேதுபதி பேசுவது போல ‘தத்துவம் இல்லாத தலைவர்கள் வெறும் ரசிகர்களைதான் உருவாக்குவார்கள். அவர்களால் எந்த முன்னேற்றமும் இருக்காது” என்ற வசனம் வைக்கப்பட்டுள்ளது. இந்த வசனம் தற்போது கட்சி ஆரம்பித்துள்ள விஜய்யைத் தாக்குவது போல உள்ளது என ஒரு சாரார் கருத்து தெரிவித்து விஜய்யைத் தத்துவம் இல்லாத தலைவர் எனக் கூறி வருகின்றனர்.

ஆனால் இன்னொரு தரப்போ விடுதலை 2 படத்தின் கதை நடக்கும் காலம் 1980 களில் எம் ஜி ஆர் ஆட்சி காலம் என்பதால் அவர் மீதான விமர்சனம் என மற்றொரு சாராரும் கருத்து தெரிவித்து வருகின்றனர். இருவருமே நடிகர்களாக இருந்து அரசியல் கட்சி ஆரம்பித்தவர்கள் என்பது குறிப்பிடத்தக்கது. இதனால் இந்த வசனத்தின் மூலம் வெற்றிமாறன் யாரைத் தாக்குகிறார் என்ற விவாதம் சமூகவலைதளங்களில் இப்போது நடந்து வருகிறது.