ஐயோ பேரழிவா?.. கணநேரத்தில் இடிந்து விழுந்த பாலம்… வெள்ளத்தில் மாயமான ஓட்டுநர்… தீவிர தேடுதல் வேட்டையில் NDRF…!!

உத்தரகாண்ட் மாநிலம் சமோலி மாவட்டத்தில் உள்ள தமக் வடிகாலில், தொடர் கனமழை மற்றும் தீவிர பருவமழை காரணமாக ஏற்பட்ட பயங்கர திடீர் வெள்ளப்பெருக்கில் அங்கிருந்த பெய்லி பாலம் முற்றிலுமாக இடிந்து அடித்துச் செல்லப்பட்டது. மலாரி-நிதி தேசிய நெடுஞ்சாலையில் அமைந்துள்ள இந்த முக்கியப் பாலம் உடைந்ததன் விளைவாக, ஜோஷிமத் மற்றும் எல்லைப் பகுதிகளுக்கு இடையேயான தொடர்பு துண்டிக்கப்பட்டதோடு, ஜும்மா, நிதி உள்ளிட்ட சுமார் பன்னிரண்டு கிராமங்களைச் சேர்ந்த மக்கள் போக்குவரத்து வசதியின்றி தனிமைப்படுத்தப்பட்டுள்ளனர்.

இந்த இயற்கைச் சீற்றத்தின் போது, வெள்ளத்தின் தீவிரத்தைப் பார்த்துக் கொண்டிருந்த எல்லைச் சாலைகள் அமைப்பைச் சேர்ந்த பித்தோராகர் மாவட்ட ஓட்டுநரான பங்கஜ் என்பவர் எதிர்பாராதவிதமாக வலுவான நீரோட்டத்தில் சிக்கி அடித்துச் செல்லப்பட்டார். அவருடன் ஒரு வாகனமும் வெள்ளத்தில் மூழ்கிய நிலையில், காணாமல் போன ஓட்டுநரைத் தேடும் பணியில் தேசிய மற்றும் மாநில பேரிடர் மீட்புப் படையினரும், மாவட்ட நிர்வாக அதிகாரிகளும் களமிறக்கப்பட்டு தீவிர தேடுதல் வேட்டையில் ஈடுபட்டு வருகின்றனர்.

இச்சம்பவத்தைத் தொடர்ந்து முன்னெச்சரிக்கை நடவடிக்கைகளைத் தீவிரப்படுத்தியுள்ள மாநில முதலமைச்சர் புஷ்கர் சிங் தாமி, துண்டிக்கப்பட்ட கிராமங்களுக்கு ரேஷன், உணவு மற்றும் உயிர் காக்கும் மருந்துகள் போன்ற அத்தியாவசியப் பொருட்கள் தடையின்றி சென்றடைவதை உறுதி செய்யுமாறு அதிகாரிகளுக்கு உத்தரவிட்டுள்ளார். மேலும், உடைந்த பாலத்திற்குப் பதிலாக மாற்றுப் பாதைகளை அமைக்கும் பணிகளை எல்லைச் சாலை வாரியம் விரைந்து மேற்கொண்டு வருவதாகவும், ஓரிரு நாட்களில் அப்பகுதியில் மீண்டும் போக்குவரத்து சீரடையும் எனவும் பேரிடர் மேலாண்மைத் துறை அதிகாரிகள் நம்பிக்கை தெரிவித்துள்ளனர்.