ஆமை போல் நகரும் அஜித்தின் விடாமுயற்சியின் வசூல்.. 5 நாட்களில் மொத்த கலெக்ஷனே இவ்வளவுதானா..?

நடிகர் அஜித்தின் 62 ஆவது திரைப்படம் தான் விடாமுயற்சி. மகிழ் திருமேனி இந்த திரைப்படத்தை இயக்கியுள்ள நிலையில் அஜித்துக்கு ஜோடியாக திரிஷா நடித்துள்ளார். வில்லனாக ஆரவ், ஆக்ஷன் கிங் அர்ஜுன், வில்லியாக ரெஜினா என மிகப் பெரிய நட்சத்திர பட்டாளமே இந்த படத்தில் நடித்துள்ளார்கள். படத்திற்கு அனிருத் இசை அமைத்துள்ளார். இந்தத் திரைப்படத்தை லைகா நிறுவனம் பிரம்மாண்ட பட்ஜெட்டில் தயாரித்துள்ளது.

கடந்த இரண்டு ஆண்டுகளாக படத்தின் வேலைகள் நடைபெற்று வந்த நிலையில் படம் இந்த ஆண்டு பொங்கலுக்கு ரிலீசாகும் என அறிவிக்கப்பட்டது. ஆனால் சில தவிர்க்க முடியாத காரணங்களால் படம் ரிலீஸ் ஆவதில் பிரச்சனை ஏற்பட்டது. இதனால் படத்தின் ரிலீஸ் தேதி திடீரென மாற்றப்பட்டது. அதன் பிறகு பிப்ரவரி 6ம் தேதி விடாமுயற்சி திரைப்படம் ரிலீஸ் ஆகும் என கூறப்பட்ட நிலையில் மிகப்பெரிய எதிர்பார்ப்புக்கு மத்தியில் ரசிகர்கள் அனைவரும் கொண்டாடும் விதமாக பிப்ரவரி 6 ஆம் தேதி  விடாமுயற்சி திரைப்படம் வெளியானது.

அஜர்பைஜானில் தனது காதல் மனைவியை கடத்திய கும்பலிடம் இருந்து அவரை ஹீரோ எப்படி காப்பாற்றுகிறார் என்ற கதைக்களத்தை கொண்ட விடாமுயற்சி திரைப்படத்திற்கு ரசிகர்கள் மத்தியில் இருந்து கலவையான விமர்சனங்கள் வந்து கொண்டிருக்கிறது.இப்படியான நிலையில் விடாமுயற்சி திரைப்படம் முதல் நாள் அன்று 26 கோடி ரூபாய் வசூலை இந்திய அளவில் ஈட்டியதாக தகவல் வெளியானது.

இரண்டாவது நாளில் 10.25 கோடியும், மூன்றாவது நாளில் 13.5 கோடியும், நான்காவது நாளில் 12.5 கோடி ரூபாயும் வசூல் செய்திருந்தது. இப்படியான நிலையில் ஐந்தாவது நாளான நேற்று வெறும் மூன்று கோடி ரூபாய் மட்டுமே வசூல் செய்துள்ளது. இதனை தொடர்ந்து ஒட்டுமொத்தமாக இந்திய அளவில் 65 கோடி ரூபாய் மட்டுமே விடாமுயற்சி திரைப்படம் வசூல் செய்துள்ளது. இருந்தாலும் விடாமுயற்சி வசூல் தொடர்பான எந்த ஒரு அதிகாரப்பூர்வ அறிவிப்பையும் லைகா நிறுவனம் இதுவரை வெளியிடவில்லை.