அஜித்தை ஒரு மன்னிக்க முடியாத வில்லனாக நான்தான் காட்டினேன்… என் படங்களில் எந்த ஒற்றுமையும் இருக்காது –வெங்கட்பிரபு பெருமிதம்!

தமிழ் சினிமாவில் இன்றிருக்கும் வெற்றிகரமான கமர்ஷியல் இயக்குனர்களில் வெங்கட்பிரபுவும் ஒருவர். அவர் இயக்கிய சென்னை 28, சரோஜா, மங்காத்தா மற்றும் மாநாடு ஆகிய திரைப்படங்கள் மிகப்பெரிய வெற்றியைப் பெற்றன. இப்போது விஜய்யை வைத்து கோட் படத்தை இயக்கி வருகிறார்.

வெங்கட் பிரபு இயக்குனர் ஆவதற்கு முன்னர் அவர் ஏப்ரல் மாதத்தில் மற்றும் சிவகாசி ஆகிய படங்களில் குணச்சித்திர நடிகராக நடித்துள்ளார். பின்னர் உன்னை சரணடைந்தேன் படத்தில் கதாநாயகனாக நடித்தார். அதன் பிறகுதான் அவர் சென்னை 28 படத்தை இயக்கினார்.

மங்காத்தா வெற்றிக்குப் பிறகு  முன்னணி இயக்குனரான அவர் அடுத்து சூர்யா, கார்த்தி, சிம்பு மற்றும் விஜய் ஆகிய முன்னணி நடிகர்களை வைத்து படமியக்கினார். அவரின் சில படங்கள் வெற்றியும் சில படங்கள் தோல்வியும் அடைந்தன.

இந்நிலையில் சமீபத்தில் ஒரு நேர்காணலில் பேசியுள்ள அவர் “நான் இயக்கிய ஒவ்வொரு படமும் ஒவ்வொரு ஜானரில் உருவாக்கப்பட்டிருக்கும். ஒரு படத்துக்கும் இன்னொரு படத்துக்கும் எந்த சம்மந்தமும் இருக்காது. ஆனால் எல்லா படத்துக்கும் இடையில் நகைச்சுவை ஒரு கனெக்டிங் பாய்ண்ட்டாக இருக்கும்.

முதல் முதலாக ஒரு நாள் இரவு திரில்லர் படத்தை (சரோஜா) நான்தான் இயக்கினேன். அதே போல ஓரினச்சேர்க்கையாளர்கள் பற்றிய படத்தை (கோவா) நான்தான் மெயின்ஸ்ட்ரீம் மீடியாவில் இயக்கினேன். அதையடுத்து ஒரு சூப்பர் ஸ்டார் நடிகரான அஜித்தை ஒரு மன்னிக்க முடியாத வில்லனாகக் காட்டினேன். அடுத்து ஒரு ஆங்கில நாவல் போல பிரியாணி படத்தை உருவாக்கினேன். அதே போல முதல் டைம் லூப் படத்தை இயக்கினேன். அதன் பின்னர் இப்போது தளபதி விஜய்யை இதுவரை பார்க்காத ஒரு கதாபாத்திரத்தில் கோட் படத்தில் காட்டியுள்ளேன்” எனப் பேசியுள்ளார்.