ரசிகர்கள் அனு அனுவாக ரசித்த கைப்புள்ள… வின்னர் படம் வெளியாகி 21 ஆண்டுகள் நிறைவு!

தமிழ் சினிமாவில் கிட்டத்தட்ட 30 வருடங்களாக கமர்ஷியல் இயக்குனராக வலம் வருபவர் சுந்தர் சி. அவர் இயக்கிய உள்ளத்தை அள்ளித்தா, அருணாச்சலம், வின்னர், கிரி, கலகலப்பு என ஏராளமான படங்கள் கமர்ஷியலாக பெருவெற்றி பெற்றுள்ளன. அவர் இயக்கத்தில் மட்டும் காமெடி நடிகர்கள் தங்களுடைய உச்சபட்சமான காமெடியை தொட்டிருப்பார்கள்.

அப்படி அவர் இயக்கிய படங்களில் நகைச்சுவையில் உச்சம் தொட்டது வின்னர் படத்தின் கைப்புள்ள காமெடி. அதுதான் வடிவேலுவும் சுந்தர் சியும் இணைந்து பணியாற்றிய முதல் படம். அந்த படத்தில் வடிவேலு கைப்புள்ளையாக அடித்த அலப்பறைக்கு வாய்விட்டு சிரிக்காத தமிழ் ரசிகர்களே இருக்க முடியாது. அதன் பின்னர் வடிவேலுவோடு இணைந்து பல படங்களில் பணியாற்றினார் சுந்தர் சி.

ஊரில் எந்த வேலை வெட்டிக்கும் செல்லாமல் உதார் விட்டுக்கொண்டு ஓசி சோறு சாப்பிட்டுகொண்டு ஊர்நியாயம் பேசும் கைப்புள்ள. அவரைத் தலைவராக ஏற்றுக்கொண்ட ஒரு கூட்டம் என எந்தக் கவலையும் இல்லாமல் சுற்றும் கைப்புள்ள கதாநாயகன் சக்தி, வேதாச்சலம் தாத்தா மற்றும் வில்லன் கட்டதுரை ஆகியோரை மாட்டிக் கொண்டு லோல் பட்டு நொந்து நூலாகிறார்.

செல்லும் இடங்களில் எல்லாம் அடிவாங்கி அவமானப்பட்டாலும் தன்னுடைய கெத்தை விட்டுக்கொடுக்காமல் மெய்ண்டெய்ன் பண்ணி தன்னம்பிக்கையின் உச்சமாக விளங்குபவர்தான் கைப்புள்ள. இந்நிலையில் இன்றோடு இந்த படம் ரிலீஸாகி 21 ஆண்டுகள் நிறைவடைந்துள்ளன. இதையடுத்து சமூகவலைதளங்களில் ரசிகர்கள் கைப்புள்ள கதாபாத்திரத்தை நினைவுகூர்ந்து இந்த படத்தைக் கொண்டாடி வருகின்றனர்.

படத்தில் வடிவேலு பேசி இன்றளவும் சோஷியல் மீடியாவில் பயன்படுத்தப்படும் வசனங்கள் சிலவற்றைப் பார்க்கலாம்.

1. கட்டதுரைக்கு கட்டம் சரியில்ல
2. வேணாம் அழுதுடுவேன்.
3. அது போன மாசம்… நான் சொல்றது இந்த மாசம்..
4. சண்டையில கிழியாத சட்ட எங்க இருக்கு?
5. அண்ணன் பேச்சு ஒன்வே… அங்க இருந்து ரிட்டர்ன் வரக் கூடாது.
6. உன்கிட்ட ஓப்பனிங் நல்லா இருக்கு.. ஆனா பினிஷிங் நல்லா இல்லையே…
7. அண்ணன் உனக்கு குச்சி மிட்டாயும் குருவி ரொட்டியும் வாங்கிட்டு வர்றேன்
8. பேங்க் ஒன்னு கட்டிக்குடுங்க நடத்துறோம்.
9. ஒரு இளைஞன், ஒரு இளைஞி கைய புடிச்சி இழுக்கதான் செய்வான். இதையெல்லாம் கண்டுக்கப்படாது… ஏன்னா இது வாலிப வயசு…