நடுநிசியில் பாய்ந்த ஏவுகணைகள்…. அமெரிக்க போர் விமானத்தின் சிறகு தூள் தூள்…. பதற்றத்தில் மத்திய கிழக்கு…. அமெரிக்காவிற்கு அதிர்ச்சி கொடுத்த ஈரான்…!

மத்திய கிழக்கு பிராந்தியத்தில் அமெரிக்கா மற்றும் ஈரான் இடையே நீண்டகாலமாக நிலவி வரும் பகைமை, தற்போது புதிய உச்சத்தை எட்டியுள்ளது. சமீபத்தில் ஈரானின் எண்ணெய் கப்பல்கள் மீது அமெரிக்கா நடத்திய தாக்குதல்களுக்குப் பதிலடி கொடுக்கும் வகையில், ஈரான் தனது தாக்குதல் நடவடிக்கைகளைத் தீவிரப்படுத்தியுள்ளது. இதன் தொடர்ச்சியாக, ஜோர்டானில் அமைந்துள்ள அமெரிக்காவின் முக்கிய விமானப்படைத் தளத்தைக் குறிவைத்து ஈரான் நடத்திய வான்வழித் தாக்குதல் சர்வதேச அளவில் பெரும் பரபரப்பை ஏற்படுத்தியுள்ளது.

அமெரிக்காவுடன் நெருங்கிய பாதுகாப்பு உறவைக் கொண்டுள்ள ஜோர்டானின் ‘முவாஃபக் சால்டி’ (Muwaffaq Salti) ஏர்பேஸை அமெரிக்க விமானப்படை பயன்படுத்தி வருகிறது. இரவில் திடீரென மேற்கொள்ளப்பட்ட இந்தத் தாக்குதலில், அங்கு நிறுத்தப்பட்டிருந்த அமெரிக்காவின் ‘ஏ-10 தண்டர்போல்ட்’ (A-10 Warthog) ரக போர் விமானத்தின் சிறகுப் பகுதி கடுமையாகச் சேதமடைந்தது. இதுதவிர, ‘எஃப்-15எஸ்’ (F-15S) ரகத்தைச் சேர்ந்த மேலும் 8 போர் விமானங்கள் லேசான சேதத்தைச் சந்தித்துள்ளன.

இந்தச் சம்பவத்தை அமெரிக்காவின் சிபிஎஸ் (CBS) செய்தி நிறுவனத்தின் மூத்த நிருபர் ஜெனிபர் ஜேக்கப் தனது எக்ஸ் (X) தளத்தில் உறுதிப்படுத்தியுள்ளார். ஈரானின் இந்தத் திடீர் ஏவுகணை மற்றும் ட்ரோன் தாக்குதல்களை எதிர்கொள்ள, ஜோர்டானில் உள்ள அமெரிக்கப் படைகள் உடனடியாகச் செயல்பட்டு 30-க்கும் மேற்பட்ட ‘பேட்ரியாட்’ (Patriot) வான் பாதுகாப்பு ஏவுகணைகளை ஏவி எதிர்த்தாக்குதல் நடத்தியதாக அவர் தெரிவித்துள்ளார்.

கடல் பகுதியில் ஈரானிய புரட்சிகர காவல்படையினரின் கப்பல்கள் மற்றும் எண்ணெய் டேங்கர்களை இலக்கு வைத்து அமெரிக்கா நடத்திய முந்தைய தாக்குதல்களுக்குப் பழிவாங்கும் நோக்கிலேயே இந்த நடவடிக்கை எடுக்கப்பட்டுள்ளது. ஈரானின் இந்த நேரடித் தாக்குதல் அமெரிக்க ராணுவத்திற்கு அதிர்ச்சியை ஏற்படுத்தியுள்ளதோடு, மத்திய கிழக்கில் மீண்டும் ஒரு முழு அளவிலான போர் மூளும் அபாயத்தையும், இரு நாடுகளுக்கு இடையேயான பதற்றத்தையும் பல மடங்கு அதிகரித்துள்ளது.