இந்தியா மீது அமெரிக்காவுக்கு திடீர் கோபம்…. ‘செக்ஷன் 301’ வரியின் பின்னால் ஒளிந்திருக்கும் உலக அரசியல்…. லட்சக்கணக்கான தமிழர்களின் வேலைக்கு பேராபத்து….!

அமெரிக்க வர்த்தகப் பிரதிநிதி அலுவலகம் (USTR), இந்தியாவில் ‘கட்டாய உழைப்பு’ முறைகள் நிலவுவதாகக் கூறி, இந்தியப் பொருட்களுக்குக் கூடுதலாக 10% முதல் 12.5% வரை புதிய ‘செக்ஷன் 301’ வரிகளை விதிக்கப் பரிந்துரைத்துள்ளது. ஏற்கனவே டிரம்ப் நிர்வாகத்தின் ‘ரெசிப்ரோக்கல்’ வரியால் உலக வர்த்தகச் சந்தை தவித்து வரும் வேளையில், இந்த அதிரடி முடிவு இந்திய ஏற்றுமதித் துறைக்கு இடிமேல் இடியாக விழுந்துள்ளது. இந்த கூடுதல் வரி விதிப்பால் சர்வதேசச் சந்தையில் இந்தியப் பொருட்களின் விலை அசுர வேகத்தில் உயர்ந்து, வியட்நாம், பங்களாதேஷ் போன்ற அண்டை நாடுகளின் போட்டிய எதிர்கொள்ள முடியாமல் இந்தியாவின் ஒட்டுமொத்த ஏற்றுமதி வர்த்தகம் பெருமளவில் முடங்கும் அபாயம் ஏற்பட்டுள்ளது.

இப்பிரச்சனை இந்தியாவின் முதன்மைத் தொழிலான ஜவுளித் துறையை, குறிப்பாக தமிழ்நாட்டின் திருப்பூர், கோவை, கரூர், ஈரோடு போன்ற நகரங்களின் வாழ்வாதாரத்தை நேரடியாகப் பாதிக்கும். அமெரிக்கா ஜவுளித் துறைக்கு ஓரளவிற்குச் சலுகை அளிக்கும் வகையில் ஒரு பிரத்யேக உள்கட்டமைப்பு வழிமுறையை முன்மொழிந்திருந்தாலும், ஒட்டுமொத்த உற்பத்திச் செலவு அதிகரிப்பதால் உள்ளூர் நிறுவனங்களின் லாப வரம்பு (Profit margins) சுருங்கிவிடும். இதனால், கோடிக்கணக்கான எளிய நடுத்தரக் குடும்பங்களைச் சேர்ந்த தொழிலாளர்கள் பணிபுரியும் ஜவுளி, விவசாயம் மற்றும் கைவினைப் பொருட்கள் தயாரிப்புத் துறைகளில் கடுமையான ஆட்குறைப்பு (Layoffs) நடவடிக்கைகள் பாய்ந்து, லட்சக்கணக்கான மக்களின் வேலைவாய்ப்புப் பறிபோகும் சூழல் உருவாகியுள்ளது.

மறுபுறம், இந்த ஏற்றுமதி வீழ்ச்சி நாட்டின் பொருளாதாரத் தூண்களையும் உலுக்கத் தொடங்கியுள்ளது. இந்தியாவின் ஏற்றுமதி குறையும் போது, நாட்டிற்குள் வரும் அமெரிக்க டாலரின் வரத்து குறைந்து, சர்வதேசச் சந்தையில் இந்திய ரூபாயின் (INR) மதிப்பு மேலும் பலவீனமடையும். உள்நாட்டு ரூபாய் மதிப்பு சரிந்தால், இந்தியா இறக்குமதி செய்யும் கச்சா எண்ணெய் போன்றவற்றின் விலை உயர்ந்து, அதன் எதிரொலியாக பெட்ரோல், டீசல் மற்றும் அத்தியாவசியப் பொருட்களின் விலை உயர்ந்து சாமானிய மக்களின் தலையில் கூடுதல் சுமையாக மாறும்.

தற்போது இந்தியா மற்றும் அமெரிக்கா ஆகிய இரு நாடுகளும் ஒரு புதிய இருதரப்பு வர்த்தக ஒப்பந்தத்தை இறுதி செய்வதற்காக டெல்லியில் தீவிரமாகப் பேசி வரும் வேளையில், இந்த புதிய வரி விதிப்பு இருதரப்பு பேச்சுவார்த்தையில் ஒரு மிகப்பெரிய முட்டுக்கட்டையை (Deadlock) உருவாக்கியுள்ளது. இந்தியாவின் உற்பத்தித் தொழில்கள், ஏற்றுமதி மற்றும் சாமானிய உழைக்கும் வர்க்கத்தை அச்சுறுத்தும் இந்த இக்கட்டான சவாலை எதிர்கொள்ள, மத்திய அரசு அமெரிக்காவின் புகார்களைத் திட்டவட்டமாக மறுத்து, இந்த வரி விதிப்பில் இருந்து முழு விலக்கு அல்லது நிவாரணம் பெறுவதற்காக மிகத் தீவிரமாகப் பேச்சுவார்த்தை நடத்தி வருகிறது.